Señales de Muerte

Pa demostrar que nun hai xéneros mayores o menores, sinón bona o mala lliteratura, llega esti llibru de Xandru Fernández, Entierros de xente famoso, el primeru de cuentos que publica dende l’añu 2000. Trátase de diez relatos que busquen abellugu baxo un títulu acertáu, anque non toos falen d’entierros (hai ceremonies fúnebres, más o menos), nin toos seyan de xente famoso. El títulu, tomáu del primer cuentu, cumple bien cola función d’individualizar el productu: los entierros (d’ehí l’éxitu de les esqueles) siguen exerciendo un influxu poderosu sobre la nuesa sociedá.

Ente los mayores aciertos d’esti llibru, que tien más, ta la variedá. D’un llau, les histories trescurren en sitios dispares: les cuenques mineres (paisaxe habitual de munchos llibros de Fernández), pero tamién la costa, Estocolmu o’l parque de Joshua Tree en California... D’otru llau, los protagonistes, masculinos, muévense nuna llinia mui sonce ente la llocura, el xacíu, la extravagancia, la maldá, la venganza, la rutina o’l miedu, metiéndose tamién dalguna vez pel camín de lo maravioso. Pero cuando Xandru Fernández construye’l penúltimu cuentu, «Caballos selvaxes, ánxeles cayíos», a base de parolaes telefóniques, ensin otres indicaciones nin acotaciones que poner la fecha nes qu’ocurrieron, ta dando bona prueba de que-y presta experimentar cola manera d’escribir, como si-y importaren tanto les técniques narratives como les histories contaes.

Na mayor parte de los relatos pasa desapercibíu esi gustu pola variación técnica, anque a veces un cambiu de perspectiva nos llame l’atención. Ye lo qu’ocurre cola «Balada del falsu DJ», qu’hasta la mitá de la historia camina nuna dirección que siguimos con entusiasmu, pa virar depués un par de veces, en poco tiempu, ensin llegar a l’altura narrativa del empiezu. Pero esi ye l’únicu cuentu menos llográu. Nos demás dexámonos llevar mansamente onde quiera l’autor, bien arropaos por una prosa llamativa, sorprendente y perspicaz, que tien los meyores llogros nes descripciones minucioses (nunca innecesaries) de la vida cotidiana, y nel retratu de los personaxes: impagable’l padre que lleva al fíu a una sidrería de la que va facer la primer comunión pa que prebe la sidra enantes que’l vino. Esi bon oficiu narrativu de Xandru Fernández permíte-y reinventar una y otra vuelta’l discursu lliterariu, y construir histories poderoses con protagonistes orixinales, mui bien dibuxaos. Y ello mandándose siempre d’ún de los meyores asturianos que se pue lleer güei.