Asturies, ¿sociedá enferma?

Qué solidariu ye l'asturianu coles demás cultures y los problemes ayenos.

Ye una cosa que siempre se me vien a la mente y que me ruca sobremanera.

Tenemos la falsa creyencia de que lo que fai bien a España fadrá bien a Asturies. Y eso nun ye asina puesto qu’España ye un país que, tal como ta montáu, cada rexón, nación, comarca, autonomía o como se quiera llamar que conformen l'Estáu español intenta apurrir cuantos más beneficios a cuenta del Estáu, meyor. Porque, too hai que dicilo, comunidaes como'l País Vascu o Cataluña, que tanta soberanía reclamen, son al empar dos de les autonomíes que más chupen de la piragua a cuenta del conxuntu d'España.

Entós ¿por qué nun dexamos de pensar tanto nel bien d'España (dios me llibre de criticar esto, ye una cosa que veo mui bien, pero too al so tiempu) y pensamos nos intereses d'Asturies? Camiento yo que precedentes hai abondos y nun hai más que mirar cómo ta Asturies güei pa dase cuenta de qu'esta manera de proceder nun-y sienta bien a Asturies.

Tenemos mieu a facer ruíu, nun queremos que mos oigan porque «a saber qué dirán», nun queremos dar que falar, nun vaya ser que se mos critique por alborotadores; tenemos que siguir cola bona fama de pueblu folixeru y acoyedor con tol mundu; somos xente mui solidaria colos demás y nosotros nun tenemos problemes, equí furrula too bien dafechu. Esti podía ser el decálogu del bon asturianu plural, progre, políticamente correutu y solidariu que piensa más nes nueves estaciones que van facer nel metru de Madrid que nel desdexu’l soterramientu de les víes de Xixón por parte del Ayuntamientu, que ta más esmolecíu polos resultaos de les eleiciones vasques que pol mal que pue face-y a Asturies la tercera llexislatura d'Areces, que ta más preocupáu pol terrorismu que pola continua salida de xente mozo d'Asturies pa trabayar fuera; que sufre más pol recorte de subvenciones a la recoyida d'aceituna andaluz que pol desaniciu del campu asturianu.

Un exemplu, estos díes, que pue amosar esti pensar ye'l debate que ta xenerando la iniciativa del ayuntamientu d'Avilés de renomar los barrios y parroquies del conceyu con topónimos tradicionales. Esta midida fizo que xorrecieren bien de detractores d'esti cambiu alegando munchos d'ellos que Las Meanas siempre foi Las Meanas y non Les Meanes porque esti últimu yera’l nome que-y daben los aldeanos a esta zona d'Avilés. Coses como esta xeneren muncha polémica na sociedá asturiana, pero la noticia de que l'arquiteutu xefe del Ayuntamientu de Xixón cometiera irregularidaes nel plan urbanísticu de Cabueñes pasen desapercibíes pa la mayoría, hasta pa la oposición nel ayuntamientu, que nin siquier pide la dimisión de naide.

Dicen que la sociedá vasca ye una sociedá enferma. Yo nun sé qué pensar, pero a la asturiana mui sana non la veo. Depués de que Areces vaya facer tres llexislatures al mandu’l Gobiernu y coles consecuencies qu'esto ta trayendo, ye más propio d'una mentalidá masoquista y autodestructiva.