79 Pidimientos

Pido una Asturies onde nun tengamos a un ventipicu por cientu de la sociedá en riesgu de pobreza o esclusión social

Nacho Vegas
Cantante

¿Que qué-y pido a Asturies? Nun puedo pensar nuna sola cosa, tamos mui faltos perequí. Pido, por casu, una Asturies na que facer música nun sía illegal en dalgunes de les nueses ciudaes. Pido tamién una Asturies onde nun viva xente sumía nel precariáu, o trabayando doce o catorce hores al día nel meyor de los casos. Pido una Asturies onde a tolos manguanes del SOMA y FSA que mancaron y reprimieron al movimientu obreru y destruyeron texíu social y cultural a esgaya los faigan emigrar d'equí, igual que tuvo qu'emigran tanta xente mozo de la mio xeneración cuando Tini decía ensin asomu de bochornu qu'eso yera una lleenda urbana. Pido que n'Asturies se-y dea más voz a espacios como La Llegra n'Uviéu, onde la xente puede dir y falar d'ecoloxismu, de feminismu o de la propia y particular realidá que vivimos n'Asturies ensin que naide-y pida el carné de soberanista. Pido una Asturies onde nunca más desaposien brutalmente a naide como ficieron con La Madreña va unos años. Pido una Asturies ensin represión policial nin de nengún tipu, ¿ye muncho pidir? Pido una Asturies onde nun tengamos que lleer y escribir en medios que tan financiaos por empreses con práutiques criminales y mafioses como la banca o les llétriques. Pido una Asturies onde nun se persiga la llibertá de prensa como ta pasando con "Atlántica XXII"; pido que nun se persiga al periodismu llibre y críticu. Pido una Asturies onde los nenos puedan deprender asturianu y onde nun tea vetáu falar n'ast nenyures. Pido una Asturies onde la nuesa llingua sía oficial. Pido una Asturies onde nun haya desahucios, onde se garanticen los suministros, onde como mínimu se cumplan las 5 de la PAH, onde se sienta más a la PAH qu'a los que faen polítiques pa la xente rico. Pido que toos y toes sepamos valorar n'Asturies el tremendu esfuerzu que fai la PAH selmana tras selmana, con tol amor del mundu y a pesar de toles torgues coles qu'atopen a diariu.

Pido una Asturies onde nun tengamos a un veintipicu por cientu de la sociedá en riesgu de pobreza o esclusión social. Pido una Asturies onde les ciudadanes y los ciudadanos puedan sentise parte de les sos ciudades; pido que se recuperen espacios públicos nos que la ciudadanía tenga la pallabra.

Pido una Asturies onde nun muerran muyeres asesinaes pol machismu. Pido una Asturies na que vivan muyeres feministas y homes profeministas que faigan lo posible pa esterrar el patriarcáu d'equí, entá sabiendo que ye daqué imposible a cortu plazu, pero sabiendo tamién que si nun intentamos lo imposible nun vamos algamar enxamás lo posible. Pido una Asturies na que cualquiera pueda follar de forma consentía con quien-y dea la gana, ensin mieu a represiones homófobes. Pido una Asturies antifascista y antirracista, y si non yo nun quiero vivir equí. Pido una Asturies na que venga a vivir y compartir con nós xente migrante, xente de la que poder deprender coses, xente a la que-y poder enseñar coses. Pido una Asturies poscapitalista, ¿o ye que nun puedo pidilo, anque sepa que seguramente eso nun lo van ver los mios güeyos? Pido una Asturies rural soberana, na que la xente nun tenga que colar pa la ciudá si nun quier, na que los nuesos pueblos y tola cultura qu'enzarren tean protexíos, valoraos y bien asoleyaos. Pido una Asturies que nun tea engochada pola porquería que suelten les térmiques coles que-y proporcionamos lletricidá a tol Estáu ensin contraprestación nenguna nin plan ecolóxicu que valga. ¡Pido que nun tengamos que dinos a vivir a Marte! Pido poder quedame n'Asturies, pero nun quiero una Asturies murnia si non una Asturies más xusta y guapa. Pido munches coses más, porque tenemos el deber de pidir si queremos que daqué camude, y yo quiero una Asturies distinta, meyor. Pídenme tamién que dea les razones poles que pido toes estes coses. Si daquién tien duldes sobre cuáles pueden ser eses razones, nun puedo más que aconseya-y, si ye que-y apetez, que llea dende enriba otra vuelta.