La Madreña, un espaciu de resistencia

La ciudá ye daqué más que los sos edificios, ye un llugar de comportamientos coleutivos. Esto desplícanos les tresformaciones culturales que’l CSOA “La Madreña” vien faciendo n’Uviéu y la contestación social al so desagospiu. ¿Cómo ye que tanta xente nagua pola cultura alternativa?... L’activismu de la mocedá ta camudando la realidá. Hai un pensamientu críticu que ye caldu de cultivu de disidencies y movimientos de rexeneración democrática de la sociedá dende’l 15 M.

“La Madreña” ye una utopía d’autoxestión. Una cultura en llibertá. La solidariedá, la cooperación, l’aición creativa son parte del so ideariu. Paecen okupes illustraos. Abren al públicu l’espaciu con biblioteca, centru d’estudios, guardería, salón d’actos, teatru, conciertos, güertos ecolóxicos, mercaos solidarios, cursos, talleres, conferencies, esposiciones, alderiques de toa triba, folixes populares... Too de baldre. Asociaciones de vecinos, d’emigrantes, families desahuciaes, coleutivos culturales, asturianistes, feministes o músicales sofiten el llugar, que val pa socializar la cultura. Les madreñeres y madreñeros faen un llabor d’utilidá pública.

Esti coleutivu lleva dos años y picu animando la ciudá. La esperiencia demuestra que nun faen falta subvenciones. Hai otres formes de xestión de la cultura más afayadices pa una mocedá ensin futuru, ensin más presente que l’aburrición. La manifestación de miles de persones que glayamos “La Madreña nun se pieslla” ye la defensa ciudadana d’un espaciu vivo que nun piensa morrer y pervive como espaciu de resistencia.

LLUGARES VACÍOS Y ESPACIOS AUTOXESTIONAOS

Espacios ocupaos como “La Madreña” recuperen llugares urbanos, son sitios per onde pasa la enerxía de la cultura. En ciudaes como Londres y Berlín son focos de nueves tendencies. Nun se pue criminalizar esa kultura y copiar arte underground con grafitis d’encargu pa dar el pegu de capitalidá europea. De pocu valen nueches blanques si’l tiempu real de la ciudá anecia cola represión cultural.

Uviéu va tener abondos espacios vacíos (Fábrica d’Armes, edificios hospitalarios...) territorios abiertos –“openlands”– de xestión inviable pa unos servicios públicos recortaos. L’autoxestión ye’l futuru. Hai esperiencies, como La Tabacalera de Madrid, nes que pautos coles instituciones déxenlos funcionar na llegalidá. Los espacios oficiales puen convivir colos alternativos. Recomiéndenlo los planes europeos de les ciudaes creatives.

LA ESTÉTICA DE LA USURPACIÓN

A solombra de la burbuya inmobiliaria vemos el delitu d’usurpación de la ciudá d’Uviéu. “La Madreña” socializa una propiedá privada que yera pública. L’antigua Conseyería de Salú privatizóse nuna escura operación urbanística que cambiaba campos de fútbol y conseyeríes por oficines nel Calatrava. Una operación millonaria que dexa muertos sociales, trabayadores despidíos ocupando Sedes abandonaes d’una empresa semipública en quiebra. ¿Quiénes serán los presuntos delincuentes?... La okupación ye como’l bandíu xusticieru que roba pa da-ylo al pueblu.

La sentencia d’una Audiencia, escontra otra d’un xuez de primer instancia, amuésanos dos xuicios dixebraos: Ún que carga tol pesu de la llei condergando a los infiernos. Otru que xulga afitando Drechos Humanos: “Toa persona tien drechu a participar na vida cultural de la comunidá...”. El drechu de propiedá será llegal, pero nun ye ético nesti casu. Vivimos la inmoralidá d’una política qu’especula colos espacios públicos, pero prohíbe ocupar esos edificios abandonaos y usalos en precario pa una finalidá social.

UN ESPACIU DE RESISTENCIA

Los güeyos miren pa la casa de los suaños llibertarios. Albidramos el retornu de la constructora, los cartelones pa la venta l’edificiu y el destín del espaciu: El solar que va quedar pa les rates.

Y calletramos la teoría del urbanismu crítico. Ye posible otra ciudá. Hai un ociu alternativu al del centru comercial. ¿Cómo ye que falten espacios municipales y per un centru social okupa pasa media vida cultural de la ciudá?... Esta probe madreñada cunde más qu’esa prometida Fundación Municipal de Cultura.

Uviéu nun pue quedar ensin “La Madreña”, pero la sentencia obliga. Tenemos d’acatar la miseria cultural. Tornar a la vida rancia, que ye la esencia de Vetusta. Cuando se niega’l drechu a la ciudá, a una cultura crítica, cuando se torga la utopía, la cosa nun tien vuelta. La resistencia ye lo que queda. La rebeldía ye una necesidá.

Nun dexen otra salida que’l madreñazu al sistema.

Ánxel Nava