Krasny Bor
El sábadu 10 de febreru cumpliéronse 75 años de la Batalla de Krasny Bor nel frente de Leningrado de la Segunda Guerra Mundial. Son munchos años y a la mayoría nun-y sonará un res. Esto ye asina porque n'España ye vezu llanta-y un color a les coses. Si se lleva esi color too va bien, sinon tas xingáu. A la División Azul, 205ª pal Exércitu alemán, pása-y eso, que nun se lleva'l so color y poro nun se fala d'ella.
Cuando la División coló pa Rusia taba tol mundu nes estaciones de tren pa despidila. Yeren tiempos anticomunistas, ganaben la guerra los alemanes y había que retratase. Cuando tornaron taba claro que diben ganar los aliados y entós había qu'escondela. Hebo divisionarios que finaron pidiendo a la puerta les ilesies. A Franco ya nun-y interesaba l'asuntu, hasta unvió pa casa al cuñau, a Serrano-Suñer, el so ministru d'Asuntos Esteriores.
El casu ye qu'aquellos homes nun yeren políticos, yeren sobretou soldaos, dende'l xeneral al corneta, toos yeren soldaos. De los bonos, de los meyores, de los qu'escriben páxines de gloria cola so sangre, de los que cualquier país nun pierde ocasión de recordalos pa exemplu de les xeneraciones vinientes.
Krasny Bor taba nun llau del cercu de Leningrado, que fue cuasi tan duru como'l de Stalingrado pero del que se fala muncho menos; nun tien película. Un cachu del frente guardábalu la División Azul y los rusos pensaron que yera un puntu débil y que poro yera'l meyor sitiu pa romper el frente dientro de la gran ofensiva Estrella Polar.
Los de nueso - porque los soldaos españoles, seya'l que seya'l tiempu y la bandera son siempres los de nueso- yeren unos cinco mil y picu. Enfrente veníen-yos cuatro divisiones, unos 45000 paisanos, con munchu d'artillería pesada y carros de combate. La batalla empecipió con dos hores de fueu artilleru sobro les nueses posiciones, llueu l'aviación repasó lo que quedada, que de posiciones nun quedaba yá un res.
Lo viniente yera l'asaltu de l'infantería y los carros rusos. Suponíase que sedría fácil dempués de tantu machaque pero entós emtamaron a salir los pequeños y malnutrios españoles de los pocos furacos qu'aguantaran. Fusiles, ametralladores y dellos llanzagranaes pa los carros. Nun quedaben trincheres asina qu'usaron los embudos que ficiera l'artillería pa tentar de protexese. Y empecipió la batalla de l'infantería, de l'Infantería española.
Cuando la Guerra de les Malvines, un xeneral inglés, ensin sentiu de la correición política, entrugáu per un periodista sobro qué yera lo que más-y preocupaba retolicó-y que la dulda sobro si los soldaos arxentinos yeren d'estirpe española o italiana, porque los españoles yeren los peores del mundu pa tener enfrente nun asediu. Los rusos nun lo sabíen.
En Krasny Bor hebo posiciones qu'acabaron les municiones, sacaron les ballonetes y combatieron cuerpu a cuerpu, notres pidieron fueu artilleru propiu sobro la posición porque nun-yos quedaba otra. En dellos puntos retroceden, notros contraataquen, siempres a más de -20º. Al segundu día los rusos nun aguantaron y colaron p'atrás. Los españoles sostuvieron el frente y la Bolsa de Leningrado duró un añu más.
Les cuentes foron terribles. Nos dos primeros díes 2300 baxes de combate, d'elles más de mil muertos, otres mil baxes más nos díes vienientes, 300 prisioneros y 91 desapaecios. Los rusos 15000 baxes.
Güei les coses son diferentes. L'Exércitu español lleva dellos años esplegando en misiones de paz pel mundu. En delles ocasiones hebo de combatir, pero seliquino y ensin falar d'ello, porque l'exércitu de nueso ye un exércitu de paz, dicen los políticos. Paecen nun querer comprender que los exercitos solo tienen dos misiones, preparase pal combate, y combatir cuando lo manden los políticos.
Recordar a los héroes de nueso ye una bona inversión pal futuru pos amuesa a los soldaos de güei cualo ye'l comportamientu que la historia d'España espera d'ellos y, amás, ye lo menos que yos debemos a los que dieron la so vida por España con honor, en cualquier tiempu, baxu cualquier bandera. Ye cosa de naciones en condiciones.
En Xixón a 8 de febreru de 2018
Raúl Suevos, coronel de Infantería
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo