L'alcordanza lo que fuimos
Pue que la hestoria fixéranos fuertes, inmunes al dolor ayenu, inclusive capaces de soportar guerres y batalles yá escaecíes. Pero per munchos años que s’asocedan la hestoria nun foi nin va ser capaz d’arrampuñanos les alcordances, les nueses alcordances.
La mio Asturies, na que crecí, construyida sobre la base negra del mineral que humildemente fíxonos ser lo que somos, yá nun tien aquel arume qu’aselaba los fríos iviernos, nin aquel color de les agües carbonizaes de los sos ríos que nes cuenques mineres tiñíen de negru cada amanecer. Bien distintu del negru d’anguaño, qu’ensin destiñir, tiñe tou nuesu alredor.
Güei veo cómo’l mio ríu yá s’amuesa destiñíu, ensin llegar entá a cristalecer, supongo que por cuenta de quel pasu de los años pasáron-y factura y la ferida entá nun encarnó. Güei yá nun se tiñe de negru'’l reflexu de la infancia que nél vía pasar los díes. El llugar de xuegu yá nun son les sos veres.
Güei pueo ver el cielu tintáu d’azul, d’un azul que quiciabes los mios antepasaos nunca pudieron esllumar, ausente d’aquel fumu que formaba la burbuya protectora del mal ayenu, pos nun cabía llugar a dolor nin pena mal curada al llau d’una madre o una güela tizando la cocina que nos daba de comer y apurríanos el calor necesariu, quemando la más mínima pena a un solu golpe paletón. Los llares nun visten d’azul los sos tendales, y el bombachu mineru yá nun ocupa llugar principal al tiempu d’encender llavadores, o tables de madera qu’al son de pastilles de xabón, sirvíen de redolada socializadora pa les muyeres qu’al llavaderu allegaben.
Güei tou ye distintu. La diversidá d’empleos de quien intenten responsabilizase d’una familia ye muncho más amplia de lo qu’enxamás nunca podríamos imaxinar, desempeñando funciones y cubriendo necesidaes va años inesistentes. Les muyeres atoparon el so llugar fuera del llar y la necesidá de qu’asina sía aumenta al par que la dificultá de ser asina ante l’ausencia d’oportunidaes.
El pasu del tiempu fíxonos convertir los nuesos raigaños en mitoloxíes y museos etnográficos pa poder recorda-yos a los nuesos descendientes qu’hubo un día nel que la vida de los nuesos padres y güelos, aldericar nel tiempu entemediu que dixebraba los soníos del turullu que marcaba’l fin de cada xornada. Col zarru de les mines, sumió’l nuesu arguyu de ser lo qu’un día fuimos.
Aquella Asturies dinamitera que protagonizó portaes de diarios, caracterizada pol so enfotu de reivindicación, perdió les sos ganes de lluchar, resignándose con ello a les condiciones que quieran imponenos, condiciones que falten enforma de lo que nel so día yá s’había consiguío. Y mentanto, la nuesa tierra ve pasar los díes, y los nuesos montes y ríos vistir de llutu al ver cómo al empar que sotierren les sos mines, queden soterraos los valores y la valentía qu’al xunise fueron capaces de construyir daqué de lo que yá namás nos queda na alcordanza.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo