El Niemeyer ensin fin
Toi acabante de lleer y perlleer l’artículu de Raimundo Abando tocante a les perres del Niemeyer y tovía toi amoriáu poles cifres y poles coses que mos cuenta.
Dende llueu, si’l tal artículu cai nes manes de dalgún fiscal o dalgún xuez, tendremos «casu Niemeyer» pa tiempu y na xurisdicción penal, que creo que ye onde tien de dir a parar esti asuntu. Por muncho menos de lo qu’Abando mos cuenta, el ministru del Interior quier meter na cárcel a esos qu’enllenaron de comida carrinos de la compra pa da-yosla a los que nun tienen nin pa comer.
Otra cosa pola qu’hai que tar agradecíos al autor del artículu ye porque, escontra de lo que dixeron bien alto y escribieron con lletres bien grandes unos y otros, resulta que Cascos tenía tola razón. Anque creo que tol procuru que puxo nel asuntu yera porque quería caciplar él en cuentes d’otru. Vamos, lo de quítate tú pa poneme yo.
Lo único que-y critico a Abando ye que, siendo ex patronu de la Fundación, cómo tardó tantu tiempu en facer público too esto. Claro qu’igual lo fizo y yo nun m’enteré.
Pero dame lo mesmo, el casu ye qu’agora, gracies a él, muncha más xente tamos sabiendo lo que llevábemos tiempu sospechando: qué yera’l Niemeyer, qué facíen los cabezaleros de la Fundación y cómo gastaben les perres de toos, non les d’ellos. Y con Areces a la cabeza, que como perbién mos recuerda Abando, un día dixera que’l so retiru diben ser el Niemeyer y l’enseñu. Torgao dafechamente lo primero, yá vemos onde quedó lo segundo: nun asientu nel Senáu.
Agora llega setiembre y los xulgaos vuelven a ponese en marcha. A ver qué pasa.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo