El «socialismu obreru» y la «peatonalización»
Soi un vecín de la cai Pérez de la Sala y vivo nel tramu que, xunto cola cai Félix Aramburu, ta falándose agora mundo de «peatonalizar».
El señor Carreño, socialista y obreru él onde los haya (según él claro) diz que ta d’acuerdu colos que nun quieren la peatonalización porque nun tamos pa gastos. Esto yera tamién lo qu’al paecer diz la mayoría de los vecinos. Tando claro qu’esto ye asina, nun podemos escaecer que si la obra la paguen los únicos que van sacar tayada de la posible «peatonalización», nin a los vecinos nin a naide va costa-y un euru la operación. Quitar el tráficu d’eses dos cais nun ye pa tanto, pues tienen yá bien poco, sacantes les hores d’entrada y salida de los escolinos; y eso va siguir igual.
El señor Carreño nun paez que sepa ónde tan eses dos cais nin los coches que puen aparcar nelles, porque si piensa que quitalos d’ehí y llevalos pal aparcamientu de la plaza de Castilla va arreglar dalgo Cinturón Verde, ta apapáu.
Polo que toca a les multes, sólo faltaba que los qu’entren na zona ensin poder nun tuvieren que pagales. Otra cosa ye que los que vivimos ehí podamos dar el nome de dos persones y la matrícula de los sos coches pa que tamién tean autorizaos a circular pola zona peatonal, pues hai que pensar na xente mayor que vive neses cais y que precisa de l’ayuda de fíos o otres persones pa que-yos lleven la compra o pa cualquier otra cosa y, entós, ye lóxico que puean entrar pa eso siempre que faiga falta.
Agora otru asuntu que nun ye pequeñu: el ruíu. Ta claro que los bares de Félix Aramburu son los que van sacar tayada d’esta obra, si ye que se fai, pues darréu, con aceres más grandes van pidir toos ellos autorización pa poner una terraza; y con elles llegará’l ruíu a tolos que les sos cases dean a esa cai. Y como meter ruíu nun cuesta y a los dueños de los bares y a los veceros nun-yos importa un res que los vecinos duerman o non... Dicho esto, abúltame que’l señor Carreño, que pertenez a un partíu que sofita’l capitalismu con gran ánimu, póngase escontra de los empresarios de la zona. ¿Tará’l señor Carreño cayendo de la burra? Nun creo; si diz que non, ye porque too esto ye cosa del PP. El señor Carreño escaezse dafechamente de que foi otru gran socialista obreru de «pro» el qu’entamó la «peatonalización» n’Uviéu: el señor Masip. De xuru que d’aquella’l señor Carreño nun reburdiaba (si yera que podía) como fai agora.
Asina que, beneficios de la «peatonalización»: pa los vecinos, nun veo nengunu; pa los de los bares, cuando pongan les terraces, tendrán los suyos.
Inconvenientes: amás del ruíu, pa los vecinos, si nun-yos dexen nomar a dos persones pa que puean entrar na zona: bastantes; pa los hosteleros, nengunu.
Agora sí, lo que tienen que pensar estos ye si-yos compensará pagar la obra, porque si llueu nun ganen lo que pensaben...
¿Ve, señor Carreño?, too tien ventaxes ya inconvenientes. Asina qu’en cuentes de dicir que non de mano ¿por qué nun piensa un poco les coses? Diga-yos a los vecinos que les obres van pagales los hosteleros y, al meyor, yá nun son tantos los que reburdien; pero nun s’escaeza del problema del ruíu, que nun ye poca cosa.
Yo toi enforma a gustu como toi agora.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo