Bla-bla-bla, Corvera, bla-bla-bla
Nun chigre, en Corvera, a l’hora’l vermú:
–Home, Paco, cuántu tiempo ensin vete. ¿Ónde te metisti, ho?
–Qué cuntes, Lolo, tuvi pa l’aldea, nun volvi hasta’l llunes.
–Entós nun viste la carta’l Suave. Esta vegada nun dirás que non ye perguapa.
–No me joribies, Lolo, no me tires de la llingua.
–Coyona, Paco, nunca tas contentu. L’Alcalde esmeróse esta vegada.
–Como voy tar, Lolo. Mis pas y mis güelos tan enterraos en Corvera, y los de la mio muyer, en Lluarca, y enteróme agora pol Suave que los asturianos nun somos corveranos. O cómo entiendes tu que sólo nome a los trabayadores castellanos, gallegos, andaluces o extremeños.
–Home, Paco, un fallu tienlu cualquiera.
–Voy date yo a ti fallu y mediu. Soi aldeanu, como diz él, no tontu. A ver si nun sabía’l que-y lo fizo lo que taba diciendo.
–Haríalo él, ho, que ta estudiao.
–Paez que naciste ayeri, Lolo. Apuéstote una de bígaros a que-y lo fizo esi que traxo d’Avilés y que pa encontralo trabayando hai que dir buscalo a Cancienes y traelo a rastres.
–Nun cayo, nun sé quién dicis.
–Sí, home, si, nun t’alcuerdes d’aquello que nos enseño’l mio nietu nel ordenador, aquellos papeles que nomaben a la de Foro y llamábenla «la Terelu».
–Calla, calla, Paco, como se entere’l Suave de que faltó’l respetu a un conceyal no-y va durar un telediariu. Nin él nin el conceyal que-y rio la chancia.
–Quita p’allá, Lolo, que nun t’enteres. Nun ves que los telediarios son agora de 24 hores, júntense unos con otros y duren hasta les nueves eleiciones. Mira que yes brutu.
–Pues, a mi gustóme, Paco, diz verdaes como puños.
–Col puñu voy date yo a ti na cocorota esa que ties enriba los costazos. Que ye too una nube, Lolo, que vienden a su ma con tal de chupar del tetu. Vete a pregunta-yos a los trabayadores que nun tienen carné del partíu, a ver qué te dicin. Ye too imaxe, Lolo, faenlo como si fora una empresa privá: toi de la mazana y del emblema esi roxo hasta’l gorru. Anúnciase to lo que se fae, como si nun supieramos quién lo fae.
–Coño, tamien Cajastur y la Du Pont lo faen, Paco.
–Sí, cuando patrocinen daqué fora la empresa. Esto ye un Ayuntamientu, nun tien na que vender.
–Anda, voi invitate a otra pintina, a ver si cierres el picu, tiesme la cabeza lloca.
–Entá siquier que t’estires, Lolo, colo qu’aforraste na comida esa que fuisti a Ribeseya ties pa unes cuantes pintes, pero ¡dexa’l vinu perreru pa la parienta, ho!
–Pos yo pasélu en grande nel baille y fartéme bien.
–Meyor-y daben trabayu al to nietu, asina nun teníes que da-y la paga’l domingu. Cualquier día a Suave ocúrrese-y facer un botellón d’esos pa los xóvenes.
–Coyona, dexarálo pa les eleiciones, tu.
–Ahí le disti, Lolo, ahí le disti.
A partir de la tercera pinta ya se fala con pasión de Ronaldo.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo