De derechos civiles, llingües y llinguateros
De qué val que miles de neñes y neños d’Asturies escueyan llibremente estudiar asturianu. ¿Ye «tipismu» que los nuestros escritores y músicos, por exemplu, empleguen l’asturianu como llingua normal d’usu y manifestación del so arte? Pa qué val que persones de ciencia publiquen les sos investigaciones n’asturianu. Pa qué val, a la fin, l’apreciu que toos tenemos pol nuesu idioma y qu’una mayoría d’asturianos apueste pol sol reconocimientu oficial, al igual qu’el restu de llingües peninsulares.
La sociedá asturiana ye plural y emplega’l castellanu o l’asturianu según-y pete. Quier les dos llingües como propies ensin avergoñase y ensin menosprecios. Poro cuando la conseyera de Cultura del Gobiernu asturianu dixo va unos meses que «el asturiano no es oficial porque la sociedad asturiana no lo pide de forma unánime», lo menos que se-y puede dicir ye que se pasó de frenada, o meyor, qu’echó la llingua a pacer.
Daquién nel so sanu xuiciu cuenta qué sedría de les sociedaes si hubiere que requerir la unanimidá del consensu ciudadanu, p’avanzar y reconocer derechos civiles y democráticos. Ello llévanos a pescudar que dalgunos, malintencionadamente, quieren vendenos una moto que los asturianos nun tamos dispuestos a comprar.
Vamos ver: llibertá relixosa, votu femenín, divorciu, matrimoniu homosexual, lleis d’igualdá, albuertu, etcétera. ¿Daquién piensa que dalgo d’ello hubiere transformaose en llei si fuera precisa la unanimidá del asentimientu social? Ye más, munches d’eses lleis que tresformaron y ameyoraron la nuesa sociedá salieron alantre con inmenses mayoríes a la contra o indiferentes; poro, si falamos de llingües, sóbrennos les llinguateres y los llinguateros.
A los dirixentes de la FSA-PSOE, verdaderos espertos en poner pilancos a tolo que cinca a la normalización de la llingua asturiana, a les fuerces polítiques que caltienen el so Gobiernu, y a les que nel Parlamentu asturianu tán na oposición, hai que-yos pidir respetu, dignidá y llealtá pal asturianu y los sos falantes. Ye’l meyor homenax pa la llingua asturiana, lo otro ye cinismu ya hipocresía que la sociedá asturiana nun ta dispuesta a soportar. Los primeros qu’incumplen la llei al respective a la nuesa llingua tradicional son los responsables políticos y culturales d’Asturies, y asina, como a los malos estudiantes, un suspensu mayúsculu. Al nuestro presidente don Javier Fernández entá nun lu oyimos dicir un «ye»; probablemente s’avergoñe de la llingua d’Asturies o, peor entá, la rechace de forme visceral como ximuestra del so modernismu y olé.
Asina lo visto, si poles sos zunes personales nun tán dispuestos a cumplir cola llexislación nin colos mandaos internacionales qu’afalen la dignificación y normalización del asturianu, si el so monumental despreciu haza l’asturianu llévalos a situaciones paranoiques que los fai incumplir reiteradamente cola mínima llegalidá que lu protexe, seyan valientes, dean un pasu al frente, díganlo públicamente y, eso sí, llueu marchen pa casa. Estos floreros tan costándonos munches perres.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo