Tesoros de Llanes
El conceyu de Llanes caltién dellos asuntos que tendrían que llamar l'atención porque hailos equí y no n'otros sitios d'España; por eso son lo que más val de tou lo que hai nel municipiu y que, pamí, son estos tres:
1) El suelu caliar del conceyu é jartu curiosu y mui guapu, nos escares (que tamién los vemos en Cabrales y el valle altu de Peñamellera, más algunu qu'hai en Sueve o enriba Camarmeña). torcas, cuetos, bufones, islas, castros, cuestas (en Llanes hai muchas), el paseo de San Pedro, el perllargu y mui estrenchu ren d'El Risque, el jaedón d'El Traviesu... tamién llama l'atención que la mar ta cerca de los altos llaniscos (pero no tantu como en Ribesella y Colunga).
2) Dellas costumbres que ya quitaren n'otros sitios, jácense tovía en Llanes, como jogueras, jogueros (que lláman-yos tamién quemas de las bruxas), el pericote, las canciones de los ramos, los enrames de las juentes y las sos canciones, dellos traxes que se visten nas funciones, la salea...
3) Las pallabras, pos son más que jartu los nombres que los antiguos usaban pa nombralo tou: de llabores (como la estajedia, el matacíu o la escapulla, que tamién y-llaman deshoja, esjueya, esmuega o esbilla), de mazanas (balsaínas, minganas, rayinas, ranetas o rainetas...), de páxaros (el gurrión, el miruellu, la papina, el verderín, el verderón...), del xuegu de los bolos (al bolu chicu lláman-y miche, míchel, michi, michu, meñique, mineque, miniqui, mique y tamién miqui), d'arbíos de la llabranza (la joce, la joceta, el jocetu, el jorcáu, el jorquetu...), de cosas de la casa (como la jerrada o jerrá y la jucha o arca), de la ropa (la montera, los escarpinos, los corales, el dengue, solitaria, rebociñu o rebocillu ...), de colores (colloráu, verde, prietu, roxu, rubiu), de comidas (bollas, casadiellas, jabas de mayu, salpitones, tortos...), de cómo son los sitios (cueros, jorcadas, juentes, muezcas o muescas, rexedales, torcas, vegas...), de los mitos (cuélebres, el diablu burllón, la güéstiga, güéstica, güéstida o güestia, injanas, inxanas o xanas, trasgos...), de mudas del pericote (entrecolar, patagüeyu, rodiellada, triscoléu...), de xuegos de críos y rapazos (las cabruxas, el chorro morro pico tayo, el escondite, escondichu o esconditu, la piedrusca, las prendas...) y muchos llamatos más d'un porción d'otros asuntos.
Tamién hai miles topónimos: Las Arruas, Comezán, La Jorcada, Joxu, El Naranxu, El Sable, El Sablón, El Sablín, El Traviesu, Vidiao... En Soberrón engólase el Picu el Castiellu y en Rales el Picu Castillu, nesti casu sin "e" por mor d'una metafonía antigua.
Las pallabras son muchas porque Llanes é un conceyu llargu, del Poniente al Saliente, y entós tien muchos pueblos, pueblinos, barriucos, caserías... y amás porque los pueblos al saliente d'el ríu Purón tienen tamién dos capas de pallabras: l'antigua (espatuxar, esperteyu, exa, muyer, panoya, el jogu l'agua) y la que vieno dempués paez que dende los pueblos montañeses (espatujar, esperteju, eje, mujer, panoja, el joyu l'agua). Nos pueblos de la oriella la mar tamién hai muchos nombres d'animates d'esa mar (nel conceyu hai pescadores en muchos pueblos y marineros en la Villa y en Niembru): la llubina, el morciyón, el pulpe, el xáragu, el yeldu... Llanes é ún de los conceyos d'España con más pallabras; en Asturias y Cantabria pue ber más pallabras románicas que nas otras provincias de la Península; otros conceyos, como Cabrales, son tamién mui ricos al respetive.
Dellos llaniscos y no llaniscos pañaren pallabras de Llanes; vo citar ná más a los difuntos qu'escribieren retajilas d'estas pallabras, que son Salvador Blanco Piñán, Luis Fernández Trespalacios, Gumersindo Laverde Ruiz, Rogelia Martínez Fernández, Pedro Noriega Sordo, Emilio Fernández-Pola Cuesta y Benigna de la Vega Meré. El poeta Pepín de Pría tamién paez que jeció un pallabreru, pero no se sabe d'elli.
Tovía quedan miles pallabras inéditas n'ocenas de pueblos de Llanes. Pañalas é'l llabor cultural que más val de los que se puen jacer nel conceyu, porque los más d'estos llamatos dícenlos ya sólu los vieyos y cuando estos muerran, ya no vamos poder saber d'ellos.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo