Paez que si fales n'asturianu yes un criminal

Viendo l’artículu espublizáu en La Nueva España, na “Columna del Llector” del 5-8-2015, onde se fai referencia a lo que pasó nel Plenu municipal del 30 de xunetu, véome na obligación d’esclariar dos o tres cuestiones.

En primer llugar, esti qu’escribe, tien de vezu falar emplegando la so llingua materna, que nun ye otra que l’asturianu y asina lo vengo faciendo y asina siguiré, puesto que semar pallabres ye una perbona manera de construyir futuru, de normalizar l’usu la llingua asturiana y de vindicar la so oficialidá; y too ello ensin falta de tener de sofitame na llei d’Usu vixente dende’l sieglu pasáu y na que s’afita el drechu a emplegar l’asturianu (Art. 3a Amparar el derechu de los ciudadanos a conocer y usar el bable/asturianu y establecer los medios que lo fagan efectivo; d) Asegurar el so llibre usu y la non discriminación de los ciudadanos por esti motivu; Art. 4.1. Tolos ciudadanos tienen derechu a usar el bable/asturianu y a espresase nél, de pallabra y per escrito).

Poro, quiero dexar nidio que n’Asturies pue falase asturianu y naide nun debería discriminanos por ello. Cosa que se fai cuando s’afirma que nos plenos la única llingua que pue usase ye’l castellán.

Dicho esto, prestaríame enfocar l’atención no que sí pasó de verdá nesi Plenu, que foi que se sacaron alantre tres mociones mui interesantes y por unanimidá, de les que paez que nun interesa falar: por iniciativa d’Izquierda Xunida salieron alantre una moción pa garantizar l’alimentación correuta de los neños y neñes de Noreña, pente l’apertura del comedor escolar en periodos non llectivos o pente otros mecanismos como puen ser vales d’alimentos… previu estudiu por parte de los Servicios Sociales de les necesidaes d’esti tipu nel conceyu. Amás, y tamién por iniciativa d’Izquierda Xunida, aprobóse una moción de sofitu a los derechos del coleutivu LGBTI reafirmando la declaración istitucional que yá teníamos aprobada dende 2013 y a la que, por cierto, el PSOE de Noreña nun-y dio cumplimientu demientres gobernó. Y pa finar aprobóse, tamién por unanimidá, una moción a iniciativa de Conceyu Abiertu por Noreña y d’Izquierda Xunida refugando la “llei mordaza”, pidiendo la so retirada, pidiendo que’l Principáu tamién la refugue y pida la so retirada, y solicitando la dimisión de les persones responsables de tan grave ataque a los derechos y llibertaes de los ciudadanos y ciudadanes.

Esto foi lo realmente importante y préstame dexalo claro porque, na mio opinión, hai persones, fundamentalmente del entornu del PSOE, que son más españolistes qu’otra cosa y que la importancia asítienla en si se faló n’asturianu o en castellán y en facer paecer que si fales n’asturianu yes un criminal. Pues nun ye asina y amás hai lleis que garanticen el drechu a usar l’asturianu.

Pa finar y enllazando colo anterior, quiero esclariar que yo nun llamé neciu ya inorante al públicu como diz l'artículu, más bien falé de que comprendía la inorancia, qu’entendía que podía haber xente que nun entendiere l’asturianu y que por eso, en determinaes ocasiones, podría falar en castellán o n’otros idiomes, pero que lo que nun respetaba nin comprendía yera la estupidez que ye lo que lleva a refugar el qu’otres persones usen l’asturianu o l’avergoñase del patrimoniu cultural propiu; esto sí me paez una estupidez y nun lo comparto nin lo respeto. Y ye más, comparé esti comportamientu antiasturianu cola homofobia en tantu que ye una forma d’intolerancia qu’atenta contra derechos fundamentales como ye’l nun ser discrimináu por usar la llingua tradicional d’Asturies; y como eso ye dalgo que me paez intolerable cuando una o dos persones del públicu se revolvíen como si tuvieren llombrices y dicíen en plan llegalista que nos plenos namás se pue usar el castellán, esplicité, dirixéndome a eses persones, que lo que sí diz la llei ye que’l públicu nun pue falar. Cosa esta cola que precisamente Conceyu Abiertu por Noreña nun tamos d’alcuerdu y asina lo demostramos día ente día pente’l nuesu furrulamientu asambleariu y pente actuaciones concretes como cuando llogramos que s’aldericare un reglamentu de participación ciudadana pa Noreña redactáu pol Frente la Izquierda y que, ante la negativa del PSOE de Noreña de tratalo d’una forma normal, tuvimos que convocar un Plenu estraordinariu pa poder aldericalo y nun salió aprobáu porque los “demócrates” del PSOE, ente otros, votaron a la escontra y namás s’algamaron los votos a favor de Conceyu Abiertu, Frente de la Izquierda, Foro e Ideas. Grupos que sí demostraron la so vocación democrática y el so compromisu pa cola ciudadanía.

La democracia participativa, el da-y voz a los que nun la tienen, pa que reivindiquen y meyoren les sos condiciones de vida, pa que participen de les decisiones que-yos afeuten, etcétera, ye dalgo colo que tamos firmemente comprometíos. Agora bien, da-y voz a una persona, o dos, pa qu’aprovechen p’amosar la so intolerancia y el so despreciu pa col asturianu y pa coles persones que somos asturfalantes, eso ye otra cosa, y pa eso que nun cuenten con nós. Y cuidao: yo nun digo que ser asturfalante seya ser más o menos asturianu que naide, eso del más y del menos nun ye propio del mio vocabulariu. Pa mi, asturianu o asturiana ye la persona que vive n’Asturies haya nacío donde seya y tea’l color que tea, y tampoco nun me llevo mal colos españoles: ser español ye dalgo que rara vez se decide (namás en casos de pidimientu de nacionalidá) y nin ye bono nin malo; lo malo, al mio entender, ye l’españolismu, que ye dalgo que caún decide pa sí y que consiste en negar el restu pueblos y cultures del Estáu tratando de poner penriba una España, grande y llibre con un modelu cultural homoxeneu basáu na tradición franquista que pretende aculturizanos como asturianos y neganos los derechos que mos asisten como pueblu, como nación, como comunidá de rellaciones socio-económiques o como se quiera llamar a esta realidá que ye’l pueblu asturianu.

A lo cabero, y pa que lo entienda tol mundu, quiero manifestar tamién que, como conceyal, trato de representar lo meyor que puedo, en xeneral, los intereses del pueblu trabayaor asturianu y no concreto los de los vecinos y vecines de Noreña que nun son homófobos, españolistes, nin esplotadores. Y, como dicía otru defensor de los que sufríen les inxusticies va dos mil años, el que tenga oyíos pa sintir que sienta, y si se quier saber esautamente lo que se dixo y cómo se dixo nel Plenu del 30 de xunetu, gracies al trabayu de la Asociación Infonoreña, que graba y publica íntegros los plenos, podéis sentir l’audiu del Plenu entrando na so web.

Pablo Pérez Fonseca, voceru del Grupu municipal de Conceyu Abiertu por Noreña.