¡Aquel prau la fiesta!...
Yera un día muy guapu de xuno, un día prestosu pa fiesta. El sol calentaba, pero no muncho, bañándolo tóo de lluz y alegría.
La misa solene acababa finar. Sería la una y media la tarde. Cuatro mozos gayasperos sacaben a hombros el ramu pan del pórticu l'iglesia, pa llevalu al prau la romería y allí puyalu nel quioscu la música.
¡Qué cuadru más guapu, madre mía! Víase a lo primeru'l ramu: coletes amarilles, coronaes pol roscón, y tóu adornáu de papelinos, cintes de colores y pañolinos bordaos. Los gaiteros, empapurriaos, lanzaben los primeros sones; detrás, la xente diba xebrando sigún salía l'iglesia.
Y allí taba'l praín, bien afeitáu (como diría Clarín), casi redondu y algo allombáu porriba, pero a lo fonderu yera llanu, podía bailase bien. Y, arrodiándolu y cruciándolu, banderines de tolos colores.
El quioscu la música con lones y aparatos propios pa la verbena la tarde. Un cachu a la izquierda, el chigre; esti, el de siempre: techu de palu d'ablanu cargáu de fueya, y de mostrador, chaplones negruzcos, pienso que con munchos años enriba; pa trás, baldes pol suelu y cacía "variopinto" en tables y caxones. Los chigreros, improvisaos, chocaben unos n'otros, tos aburiaos, pa sirvir aquel vagón de xente que nun fací amás que pidir: ¡chaval, apúrreme dos de sidra, ho!...; una Coca fría; oye, tú, esi cachu empaná, né...
Y enfrente, víase'l llombín el prau a tope margarites, florines de tolos colores y yerbes que ficieren la burliquina a la gadaña. Y, claro, mariposes por tolos llaos. ¡Qué bien golía to aquello!
En mediu, l'abanicu'l prau, tres fresnos como tres testigos melosos y parloteros, que prestaba más el valos que dir pa debaxo dellos, pos la calor yera llevadero.
Los gaiteros seguíen tocando entre culín y culín, y los sones de la gaita cruciábense coles voces del payador: 600 pesetes a la una..., 600 pesetes a les dos...
La xente taba repartío: dellos queríen d'aquel pan tan buenu, nun importaba'l preciu, amás les perres yeren pal patrón...; otros falaben colos sos vecinos o forasteros, tomando daqué. Los rapacinos, unes veces bailaben animaos pola gaita o diben agarraos al güelu pa que yos comprara ablanes turraes o d'alguna cosicata o llambioná nos puestinos que taben espendolaos pol prau.
¡Qué bien tábamos allí! ¡Cómo atarrecía dir pa casa! Pola tarde golvíamos, pero esto yera otra estampa, yera otra hestoria...
Alfreda Álvarez Argüelles
Oviedo
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo