Bullying
Cada día llevantámonos escuchando nes noticies dalgún casu nuevu de bullying. Paez una epidemia na que naide va tomar les medíes precises y útiles pacabar con ella. Agora que punxeron un teléfonu a disposición de los que sufren acosu, tendríen qu'haber aprovechao y revisao les lleis y les penes.
Entendemos el bullying como l'acosu físicu o psicolóxicu al que someten de continuo a un alumnu/-a los sos collacios/-es. Pero ¿qué diz la llei n'España? Nun existe nel Códigu Penal nenguna falta o delitu que recueya específicamente l'acosu escolar, de mou que toles aiciones referíes a esti conceutu queden dientro del delitu de "tratu degradante". Pero lo degradante ye qua estes altures nun haya una llei específica que castigue l'acosu escolar o bullying. Si se trata de mayores de 18 años, castígase con una pena de prisión -de 6 meses a 2 años-. Si, pol contrariu, l'acosador ye menor d'edá, aplícase l'artículu 8 del real decretu (derechos y deberes de los alumnos y normes de convivencia nos centros), ónde se fala, ente otres coses, del derechu del alumnáu a la integridá y dignidá física o moral, del respetu a la so intimidá, de la proteición escontra toa agresión, pero nada más. Bones pallabres.
Según informen dalgunos espertos, el 90 por ciento de los casos de bullying tienen síntomes d'alerta previos, por exemplu ún de los más comunes ye que los menores nun quieran dir al colexu porque padecen el síndrome conocíu comol del "domingu pela tarde". Señalen amás que os meses de setiembre-ochobre, xineru-marzu y abril son dómines nes que mayor atención se tien que prestar al estáu anímicu de los menores: l'alerta ante l'apaición de golpes, moratones inxustificaos, cambios de comportamientu, de calter. Tamién de si'l neñu nun tien ganes de ver a los amigos, nin de salir de casa.
Ye bien fuerte que nestos tiempos nun pueas nin estudiar, nin dir a la escuela, nin salir de casa tranquilu por tener mieu a topate colos neños que t'acosen, o qu'apaezan nenos con marques nel so cuerpu, moratones, etcétera, ensin que nadie se percate dello.
¿Cuántos neños o neñes -como la xoven de 14 años que se tiró al mar dende'l barriu de La Providencia de Xixón, o como l'adolescente discapacitada de Madrid que se suicidó tres sufrir acosu escolar, o tantos y tantos otros tenemos que ver morrer o sufrir enantes de que la sociedá y la llei tomen les medíes precises pa protexelos?
Carmen Sánchez Cobián
Pola de Lena
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo