Boicó a Israel, el porqué y delles coses más
El miércoles 22, los hermanos d'Andrés preguntábense nel mesmu articulu d'opinión y en castellanu académicu que por qué el boicó a Israel. El casu ye que na so exposición mentaben una buena riestra d'estaos, que según ellos, deberíen de tener los mesmos merecimientos de boicó que l'estáu terrorista d'Israel por atentar contra los DDHH. Ente otros, apaecía, por poner el casu, Cuba. Independientemente de lo que yo piense de Cuba, ¿nun-yos basta a los señores d'Andrés colo que tuvo que carecer el pueblu cubanu nestos poco menos de sesenta años de bloquéu económicu, comercial y finacieru? Otru que tamién figuraba nel llistáu yera USA pero la de Trump, of course, porque la USA de la dómina pre-Trump nun fexo méritos abondos anque fuere regando de sangre y ciscos internos Oriente Mediu y África nes sos campañes pola "paz" mundial o enllenara Centroamérica y Sudamérica de dictadores títeres que nun fueron unos anxelinos con buena parte de la so población.
Sicasí, sorprendióme que nun apaeciere nengún estáu d'Europa. ¿O ye que pa los señores d'Andrés la política d'acoyida de refuxaos de la UE y de los estaos miembro respuende a les sos expectatives de respetu a los DDHH? En qué pensaben estos dos señores cuando apunten pa otros y obvien que nel estáu español ta persiguiéndose disidentes polítiques, que ta vixente una llei qu'atenta contra la llibertá d'expresión, qu'existen les CIEs, que según denuncien dende Estrasburgo, la ONU y organizaciones como Amnistía Internacional, les práctiques de tortura y maltratu son sistemátiques nes comisaríes, cárceles y les propies CIEs... Y nun sigo porque les ringleres tarán cuntaes y entá he de contesta-yos el porqué del boicó a Israel.
Israel lleva munchos años saltándose tantes resoluciones como la ONU asoleya no que respecta al conflictu con Palestina y mientres, sigue coles sos polítiques de terror, expulsión y ocupación de la tierra y restaurando en tierra palestina un segundu "Apartheid". ...nte esta situación nengún estáu de la "Comunidá Internacional" fai nada pa remedialo. Asina que'l boicó supón un mediu de presión popular non violentu qu'ha d'abordar el tarrén económicu, cultural y deportivu y cualquier otru ámbitu qu'aliente, promocione y/o xustifique les polítiques de carácter sionista. El fin d'esti boicó, como nel casu sudafricanu, ye arrequexar al estáu sionista, apoyar al pueblu palestín y abrir el camín al fin d'esta inxusticia.
Lo que más m'extraña del casu ye que los señores d'Andrés duldaren del porqué del boicó y non del porqué Israel, vista la so situación xeográfica, xuegua competiciones europees (Tamién ye verdá que pa min, Israel nun debiere participar en nengún ámbitu, yá que nun representa nengún de los valores que tuvieren que ser fomentaos al traviés del deporte).
Y yá p'acabar y nun teniendo nada que ver col tema, prestábame dirixime a los Sres. d'Andrés. Taría bien que l'asturianu tamién fuere utilizáu como llingua vehicular nos vuestros artículos d'opinión, Sres. d'Andrés. Si namás van gastalo n'ambientes asturianistes y académicos, vós mesmos son cómplices del "apartheid llingüísticu" asturianu. ¡O ye qu'al final va resultar que tienen más en común col sionismu de lo que yo pensaba!
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo