Trabayar nel estranxeru
Güei en día munches persones vense obligaes a marchar a países estranxeros a vivir y trabayar. Ente 2008 y 2015 el númberu d’españoles que viven nel estranxeru aumentó un 56%, siendo los países más populares Arxentina, Francia, Venezuela y Alemaña. Nel mio casu, foi más por gustu que por obligación (o más bien por obligación conmigo mesma), pero ya seya por una cosa o pola otra, merez la pena.
Nos dos años que viví n’Inglaterra tuvi dellos trabayos diferentes, conocí muncha xente nueva y fixi munchos amigos. Viví munches esperiencies nueves, ameyoré’l nivel d'inglés y acabé avezándome tanto a les costumes d’ellí que cuando volví pa España costóme más d’un mes volver a adaptame a les españoles.
Anque pienso que vivir nun país estranxeru ye una maravía y una esperiencia que toos tendríemos que vivir dalguna vegada, tamién hai nello dalgunes desventaxes –na mio opinión les menos– que “puen llevase” perfeutamente si t’enfotes.
En primer llugar, tar lloñe de la familia. Ye duro, pero coles nueves teunoloxíes ye lo más fácil del mundu llamar por Skype o falar por WhatsApp colos seres queríos. Inclusive los vuelos son cada vez más baratos y accesibles, asina que ye fácil volver a casa poles vacaciones o cuando la murnia ye mui grande.
La otra inconveniencia ye la soledá qu’a vegaes pue tenese, inclusive mieu, sobre too al entamu de vivir nun país nuevu y nuna ciudá desconocía. Nel mio casu, nun tuvi munchos amigos mientres los seis primeros meses viviendo ellí, y foi duro, pero darréu descubrí qu’ellí –a la contra que n'Asturies– úsense muncho más les redes sociales como Facebook pa conocer a xente nuevo y facer amigos. Asina conocí yo a una de les mios meyores amigues, anque al principiu duldé un poco, nun taba avezada a conocer a xente asina. Pero cuando la conocí en persona, foi una allegría. De normal ye tan fácil como buscar un grupu en Facebook de dalgo que t’interese y poner un comentariu esplayando lo que quies y nunes hores tienes xente asgaya unviándote mensaxes porque quieren lo mesmo y tan interesaos en conocete. Esta ferramienta ayudóme munchísimo pa conocer los amigos que tengo anguaño y tamién con coses que nun entendía y que xente que llevaba viviendo ellí más tiempu, sí.
Por eso’l mio conseyu ye: sal, disfruta y collecha esperiencies nueves, vas agradecelo tola vida.
Lucía Fuster
IES de Lluces (Colunga)
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo