Por Pepe el Ferreiro y pola llibertá
Vamos sacar la cabeza por Pepe el Ferreiro. Y pola llibertá... Nestos tiempos traidores que nun medra freba paez que cunde escabezar xente que tien el vezu d’andar con ella tiesa. El Ferreiro sobra nesta burocracia, porque pelea pola cultura tradicional escontra la «nueva ruralidá» de diseñu y propaganda. Nun calla. Y ye neciu. Tien la cabeza dura, como de piedra ferrial.
La tiesta tarazada del Ferreiro, llantada con boina y too na plaza de Grandas, ha ser un escarmientu exemplar. Agora que les navayes de Taramundi afílense nos despachos y estáñense les potes de les cacerolaes, habrá que llevantar picota pa que tol mundu vea l’espeutáculu del escabezu y deprenda a dir pelo segao. Plasmen dafechu vecinos y foriatos cola execución pública d’un paisanu que trabayó tola vida pola memoria rural y dexó un llabor fecho detrás. Yá ven cómo-y agradecen a esti home’l muséu que fundara.
La metodoloxía d’esta purga ye pintao a la destitución d’Isaac Díaz Pardo en Sargadelos, la cerámica qu’él reaniciara en Galicia anovando la tradición cola modernidá pa facer pieces de fama mundial. Díaz Pardo fixera un llabor cultural y social impagable pa la cultura gallega y diera-y trabayu a toa una comarca. Yera un mitu de la «xeneración Nós», pero de vieyu diba ser depuráu polos tiburones d’esti asaltu a la cultura identitaria. Pintábanlos Castelao y Celso Emilio Ferreiro, «os tempos dos caciques» d’una irredenta Galicia, que ta pegao a Grandas. D’esa escuela asturgalaica enfotada col país ye Pepe el Ferreiro, que canta les verdaes del ferreru a la que bate’l mazu. Con aquel «Catecismu del llabrador», que fora’l creu del paisanaxe d’Asturies y Galicia.
Dicíen que’l Muséu del Pueblu d’Asturies diba ser «cabecera» de museos etnográficos de la tierra. Cabecera será, de cabeces retrañendo como les de la campana de Huesca. El Ferreiro ye en sí mesmu una pieza etnográfica. Pieza de muséu acabará esa cabeza independiente, metida en sal como si fore «calamona», «calamiel.la» o «cachucha» de xabaril, a ver cómo la clasifiquen nel inventariu xeneral. Inda tendrán de pasar cuentes a un home que podía facer les del ferreru al diañu: ¿cuántu-yos costaría agora la coleición etnográfica…? El Ferreiro tien un pecáu, ser un paisanu, dalguién pal que la pallabra ye meyor que la lletra de pagu: «De ferreiro a ferreiro nun pasa dinero». Non, la piedra del Ferreiro nun val pa los tiempos fatos que dicen ser posmodernos.
Tiempos de fierro son estos nos que medren los grandes «contenedores museísticos» que nun tienen más que paneles de forespán y perres, malque nesos «contienentes» escomanaos nun saben qué «conteníu museográficu» meter. L’anticuáu muséu etnográficu de Pepe el Ferreiro nun casa cola ideoloxía oficial d’un parque temáticu del Osu Yogui nel «paradising» de Yellowstone. Ta demasiao apegao a la tradición, a la identidá, que ye dafechu lo que se conderga, lo que se quier arrincar de raigañu. Hai que lo segar pela freba, pa que les barbes del Ferreiro vean pelar… Camentábemos que’l respetu a la disidencia yera midida d’una democracia, y tiempos vemos en que la llibertá na vida pública vien reculando y roñeciendo. Pero que nun escaezan la xarrapa que nel aire rapa’l papelu de barba. Yá llegará’l tiempu d’esferraxar, qu’ente martiellu y yuncla a fueu y carbón funde’l fierro. «Quien a fierro mata, a fierro more». Yá vendrán los tiempos de la votación.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo