La democracia: un valor tan preciáu como fráxil

Col murniu panorama políticu que tovía sigue ufiertando la Humanidá a lo llargo y ancho del planeta, rescampla que la democracia más que constituyir una realidá, en verdá ye un proyectu a construyir na mayor parte de los países, y a defender y ameyorar nos demás. Si nunes llatitúes atopamos con dictadures sangrines, n’otres esisten democracies onde se promueven lleis que llinden drechos y llibertaes que son consustanciales al ideal democráticu.

Pel mediu tenemos una amplia gama de réximes autoritarios más encontaos nel usu de la coacción que nel de la negociación política. Considero que’l pluralismu ideolóxicu ye imprescindible pa una sociedá dafechu democrática, nun esistiendo más llimitación a talu pluralismo que’l debíu respetu y defensa de los derechos humanos, que s’espera de cualquier formación demócrata.

Dende l’añu 1959, Cuba lleva instalada nun déficit democráticu inalmisible na actualidá. Esto asocede dempués d’una revolución contra otru réxime tamién inalmisible al que llueu se diben paecer los nuevos dirixentes de la islla que la convirtieron, con Fidel Castro a la cabeza, nuna dictadura más, como toes, intolerante y antidemocrática. Los llogros que pudiera consiguir esti réxime en determinaes cuestiones nun xustifiquen en nengún momentu la estructura de control social esistente alredor del Partíu nin les llimitaciones nel exerciciu de les llibertaes civiles. Dende 2008, el réxime convirtióse amás nuna especie de monarquía al heredar Raúl Castro’l poder, siguiendo’l modelu de la tamién marxista-leninista Corea del Norte.

Anque como militante del PAS la mio esmolición principal y prioritaria son Asturies y el bientar de los sos ciudadanos, como demócrata creo que nun se puede llexitimar lo que pasa en Cuba, onde hai una serie de drechos y llibertaes que directamente nun esisten pa los ciudadanos cubanos. Esisten tovía munches dictadures que primen a los sos ciudadanos con toa crudeza, como China (ye bien conocíu l’etnocidiu al que se ve sometíu’l pueblu tibetanu), Arabia Saudina (esi gran aliáu de los Estaos Xuníos onde impera’l fundamentalismu islámicu) o, muncho más cerca d’Asturies, Marruecos. La monarquía marroquina (cola que caltien l’Estáu español una serie de rellaciones que son más que cuestionables) non yá prime a los sos ciudadanos, sinón tamién a los que tienen reconocida la so nacionalidá estremada pola Naciones Xuníes, los sah.arauis.

La llista ye enorme y nun inclúi namás a dictadures reconocíes abiertamente como tales sinón tamién a supuestes democracies. Contra toos estos réximes la respuesta de los demócrates tien que ser de firme solidaridá colos ciudadanos primíos.

Independientemente del país del qu’atopemos y de la ideoloxía de represores o reprimíos, cualesquier déficit democráticu tien de ser denunciáu. Como progresista y demócrata, nun entiendo la postura d’aquellos que se definen d’izquierdes y sofiten la falta de llibertá en Cuba o n’otros llugares. Persones que dicen defender unos valores equí como, por casu, el matrimoniu ente persones del mesmu sexu, la llibertá d’espresión o los mesmos derechos de los homosexuales… y que nun dicen nada al rodiu de los vexames, humildaciones y otra serie de privaciones de derechos pa persones con una determinada orientación sexual en Cuba y n’otros países, o sobro`’l silenciu obligáu de munchos. El doble raseru tien d’acabase yá.

Y por eso tamién tenemos que denunciar les inxusticies y acontecimientos antidemocráticos que se dean nes sociedaes democrátiques europees y americanes. Por casu, la desprotección de los ciudadanos de los EE XX, que nun cunten con una sanidá que cubra les sos necesidaes (anque esto paez qu’estos díes escompencimia a cambiar) pues creo que la democracia tamién tien una dimensión social: nun basta namás con un Estáu de drechu, ye imprescindible tamién l’Estáu social. Igualmente son esenciales la llibre alternanza nel gobiernu o la llibertá informativa.

Y munchos nun escaecemos como’l presidente Areces terminó coles posibilidaes de que Teleasturias, una cadena crítica col Gobiernu, siguiera emitiendo y cómo robó la llicencia de Radio Sele, ganada nel tiempu de Sergio Marqués nun concursu públicu, pol simple fechu de que lleva emitiendo n’asturianu dende va cuasi un cuartu de sieglu. Izquierda Xunida apauta col señor Areces y dexa estos atropellos a la llibertá d’espresión. Pa evitar que lleguemos a una situación como la d’otros llugares, la respuesta tien de ser clara contra toos aquellos que quieran esaniciar o llindar les llibertaes ciudadanes, en China o n’Asturies, nos EE XX o na República Checa. Les persones siempres tienen el mesmu valor y merecen esfrutar de los mesmos derechos.