Los funcionarios asturianos nun son ciudadanos
Según el xuez de lo contencioso-alministrativu númberu 3, d’Uviéu, don Miguel Ángel Carbajo Domingo, y acordies cola Sentencia por él firmada de 23 de marzu de 2010, los funcionarios asturianos nun son ciudadanos. Asina de claro. Él quedóse más anchu que llargu, y el común de los mortales plasmamos ante tala aseveración.
Pa la so ilustrísima, un funcionariu asturianu nun puede mandase de la llingua asturiana pa pidir al so superior un permisu médicu; eso sólo ye pa los ciudadanos.
O tamos toos llocos o equí dalgún ta faciendo nun sé qué fuera la pota.
Y lo más grave de too ye que esa «Sentencia» (sic) carente de toa basa llegal y enllena de prexuicios pa cola llingua asturiana y los sos usuarios, díctase unos díes namái después que’el Tribunal Constitucional casique por unanimidá dixere xustamente lo contrario.
Nun puede ser que un derechu democráticu como ye’l llibre emplegu de la llingua materna, quede al albur o criteriu d’un xuez. L’asturianu tien de ser ya reconocíu oficialmente como llingua propia d’Asturies, y los derechos de los falantes deben ser ya reconocíos igualmente. Ese especie de llimbu xurídicu nel que dellos, mui minoritarios, quieren dexar que muerra l’asturianu ye intolerable una sociedá democrática y moderna.
La llingua asturiana ye un patrimoniu inmaterial que pertenez a toos los asturianos, usuarios o no de ella, y el so emplegu ye un derechu que nun va contra naide. L’asturianu como llingua oficial tien de ser un puntu de xuntura de toos, pa que aquel que-y pete pueda emplegala llibremente, ensin imposiciones que naide nun quier, ensin ser castigáu nin discrimináu por ello.
Conculcar derechos nun paez el camín más afayaizu. Esti xuez enquivocóse y la so sentencia ye cenciellamente un despropósitu.
El Tribunal Constitucional reconoz que la llei d’Usu del Asturianu, que mos avera a la oficialidá, ye perfeutamente llegal, y los ciudadanos tienen derechu a emplegala y a ser atendíos pola Alministración. Y cuando fala de ciudadanos nun discrimina ente funcionarios, gaiteros, socios del Sporting o productores d’afuega’l pitu.
Del l’actitú del Gobiernu asturianu val más nun falar. La so falta d’altura intelectual y cultural, cuando non la mala fe, ye ximuestra del so ya tradicional proceder siempre a la escontra de los derechos llingüísticos de los asturianos.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo