Un romance de guerra
Ello que cuando los Estaos Uníos declararen la guerra a España el 25 d’abril de 1898 el Gobiernu español sabía que diba a perdela, pero no s’atrevió a pidir la paz porque el pueblu y los qu’escrebían taban ciertos, mui ciertos, de qu’España diba a ganar a una nación con poca tradición militar y a la que ponían pingando.
Eso pensaban, y la Marina de Guerra española era güena, pero la gringa, que no era de las meyores del mundiu, sin embargu sí lo era más que la nuestra y la flota que se mandó a Cuba, mal gobernada pol derrotista almirante Cervera, cabó nel jondu la mar, jundía por aquella sin casi un resguñatu y con ello perdiérense Cuba, Puertu Ricu, Las Jilipinas y Guaján (Guam, en lluenga inglesa).
Lo que pasó, entós, joi mui distintu de lo qu’esperaban los españoles, y la derrota más que clara jecio que las xeneraciones lliterarias, filosóficas y políticas de 1898 y 1914 garraran una visión pesimista d’España y la so hestoria cuando en verdá éramos el sétimu país más juerte d’Uropa, que cada añu tenía más industrias y comercios, más xente estudiáu y más llibertá. Esi pesimismu allega al siglu XXI porque muchos, y de los que más mandan, piensan tovía qu’España no valía ni pa jendedoriu, ni nesi tiempu ni n’otros.
El casu e que n’Asturias tamién casi tola xente na primavera de 1898 taba enjotáu na vitoria y asina lo escrebieren en castellanu y n’asturianu; ente los versos qu’iguaren p’ayudar a las tropas españolas ta esti romance sobre la Virgen de La Guía de Llanes (que d’aquella no tenía bandu, sino qu’era de tolos llaniscos), jechu nesta villa por un anónimu (firma “L.”) del poniente del conceyu (lo que se sabe por cómo escribe los dativos) cinco díes dempués de la declaración de guerra y unu aniantes de, diz el pedióricu onde salió el primeru de mayu d’esi añu, “la misa solemne que se celebrará mañana en la capilla de la Guía, para implorar que la Virgen guíe á nuestros marinos que van á luchar por la patria en los mares de América”:
El versu, cortu, e belicosu, relixosu, empondera la hestoria d’España, echa pel enemigu, jabla de los llaniscos qu’embarcaban p’América... ello e lo que se pensaba nesos años:
Virgen de Guía que estás
en esi altu pintureru
que ti consagró la Villa
cuando escollisti'l so puertu.
Seguru amparu y enjotu
de los probes marineros
que cuando el mar brama y ruxe
llevantan á Ti los güeyos.
Soberana á que encamientan
las madres los jíos tiernos
cuando los únvian pe’l mundiu,
de la tierrina muy lejos.
Hoy Llanes que ve la patria
enredada con un pueblu,
que, traidor como el raposu,
como el vilán rampiñeru,
quier pillar lo que allá alantre
conquistaren nuestros güelos,
De tou corazón ti pide
que guíes los barcos nuestros
y los valientes soldaos
pa que, como en otru tiempo,
castigue España al infiel,
con pasmu del universo.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo