Villa Schifanoia
Ye llamativu que la cuarentena encamentada pal coronavirus seya de 14 díes, la mesma duración que, con ocasión de la tarrecible peste que mató a cuatro quintes partes de la población Florentina a finales del S. XIII, propunxo una imaxinaria moza a les sos amigues pa retirase a una villa na contorna de la ciudá y asina superar la crisis. Será quiciabes un chisgu desos que suel facer la historia que nesta oportunidá mos quier recordar al Decamerón
Boccaccio escribió la historia, una serie de cuentos ente cómicos, tráxicos o eróticos, filvanaos polos protagonistes d'aquella cuarentena, ensin saber que sería un de los grandes finxos de la lliteratura universal y tamién base pa un guión cinematográficu que Pier Paolo Pasolini convertiría nun divertimentu fílmicu gloriosu va yá unos cuantos años. Quiciabes fuere esta una gran oportunidá pa la so reposición en dalguna cadena televisiva. Quién sabe.
La tradición quier que'l llugar elexíu correspuenda a la conocida como Villa Schifanoia, un exemplu magníficu de villa renacentista que s'atopa na contorna de Florencia, en Fiésole, l'encantador municipiu que domina la capital renacentista dende'l so puexu d'oríxe etruscu.
Una villa, Schifanoia, que'l so nome lliteralmente significa "refuga l'aburrición" y qu'anguaño pertenez al Institutu Européu de Fiésole, una institución de la Xunión Europea fundada en 1972 pa estudios de postgráu en disciplines estremaes del campu les humanidaes y que tuvo como presidente a José Borrell va yá dellos años. Los sos becarios, demientres cuatro años, realicen la so formación doctoral, maestríes u otres investigaciones.
La peste actual, esi coronavirus que si s'atiende a unos, el Fondu Monetariu o la Organización Mundial de la Salú, supón un riesgu descomanáu pa la economía y les persones, que lleva a midides drástiques a países como China o Italia; y si s'escucha a otros, como al gobiernu de nueso, nun supón un peligru al que la sanidá pública española nun pueda facer frente. Tanto ye asina que nun hai por qué dexar d'allegar a les sidreríes y, pel momentu, a les manifestaciones de toa mena que se convoquen nestos díes. Pues esa peste, pandemia, o lo que seya nun creo que güei dé pa nada paecio al Decamerón.
Florencia tenía dalgo menos de cien mil habitantes, sobrevivieron veintitantos mil. Les cifres del nuesu yá familiar coronavirus son muncho más benignes pero la llerza que yá xenera, llerza asacable al tratamientu informativu qu'unos y otros-y otorgaron, provoca'l vaciao de cais y negocios ellí au se desamarra, como asocede güei n'Italia, pero muncho me temo que nun ye un encierre conducente como contaba Boccaccio.
Nesta dómina la nuesa vida nun mos dexa aisllanos nin cuando tamos solos. Internet, les redes sociales, la televisión, les compres a distancia; ye un aisllamientu mui rellativu y ye posible que la situación sirva pa dar un emburrión al mundu llaboral al potenciar el teletrabayu, quién sabe. Más difícil ye que sirva pa, como asocedía nel pasáu en situaciones d'encierre forciáu, amontar los índices de natalidá, al contrario, ye fácil que ponga a prueba a más d'una pareya poco avezada a soportase demientres tantu tiempu en tan estrecha compañía. ¡Qué peste, señor!
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo