La ideoloxía, parapetu escontra'l virus
Ye chocante que la pandemia del coronavirus s'estenda pol mundu dexando a salvo a dalgunos países. N'América atopámonos col conxuntu que formen los países del socialismu del sieglu XXI, Venezuela, Nicaragua y Cuba. Los tres paecen contar con una proteición especial que los caltien a resguardu del peligru; tolo contrario d'Ecuador, que refugando a Correa alcuéntrase agora asediáu pol coronavirus.
Ye bono que'l morbu nun entre nesos países; el sistema sanitariu nun paez que tenga los resortes pa face-y frente a lo que se-yos pue venir enriba. Venezuela lleva años viviendo nun "sálvese quien pueda" y con muncha frecuencia lleguen noticies del estáu d'abandonu nel que s'atopen los sos hospitales polo que cuesta trabayu maxinar cómo podría empiorar la situación ellí. Ye tan mala la situación hospitalaria que la epidemia podría tardar en ser declarada simplemente por non atalantada. El réxime bolivarianu tien el país talmente postráu que'l coronavirus malpenes da mieu.
En Nicaragua Ortega ta algamando lo que paecía imposible, facer bonu a Somoza. Tantos muertos y tanta revolución p'acabar como un sátrapa más de los munchos que tiranizaron a los pueblos iberoamericanos a lo llargo los años. La so vecina Costa Rica yá tien el virus y col trasiegu d'emigraos que diariamente flúi ente dambos países paez difícil paralo. Va ser dalgún tipu de fuercia proteutora que nun algamamos a comprender la qu'enzanca la so entrada.
El casu cubanu ye estremáu. Cuesta entendelo teniendo en cuenta qu'Italia, Francia y Alemaña tán ente los principales emisores de turistes haza la Perla del Caribe. Una situación extraordinaria como cuasi tolo rellacionao cola islla, especialmente tocantes la salú, un apartáu nel que, con inversiones mínimes dende qu'en 1989 la URSS los abandonó, caltiense una "imaxe" de solidez mui lloñe de la realidá.
En Cuba yá sólo-yos queda un hospital en condiciones aceutables, ye'l perteneciente al Ministeriu del interior, au "cuidaron" del presidente Chávez hasta que morrió, y al que namái la Nomenclatura del réxime y les sos families tien accesu. El restu de la población tien qu'apechugar con estructures muy anticuaes y deterioraes, asina como una falta total de melicines y tamién de productos hixénicos básicos. Pero'l virus nun entra en Cuba.
¿Sedrá'l bloquéu o sedrá la ideoloxía que los protexe? O simplemente sedrá que, como en tolos reximes totalitarios, la información ye'l poder.
Raúl Suevos
A 8 díes vencíos de marzu de 2020
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo