Normalidá aparente nel Muru
Taba güei'l Muru de San Lorenzo cuasi como siempre, como si'l covid namái fuere un mal suañu; chalecos mariellos controlando les escaleres y el personal coles sos mázcares recordaba que la situación nun ye pa nada normal. Tamos viviendo un branu que va quedar nos añales de la nuesa rexón como nel so momentu quedó'l de la gripe de 1918. Va haber qu'asumilo.
La nuesa rexón paez liderar el país en cuanto a la xestión de la pandemia; siguimos ensin nuevos contaxos depués de varies selmanes y la visión del Muru, u l'usu de la mázcara yera mayoritariu, amuesa que la población cuenta con un escelente nivel de civismu, actitú fundamental pa vixilar y doblegar la crisis. Queden dellos aportunantes, demasiaos pa tener xustificación médica, que, penriba del comportamientu incívicu, desprecien a los sos conciudadanos col so comportamientu.
N'España apaecen y multiplíquense'l númberu de brotes nuevos, con confinamientos de comarques n'estremaes rexones del país. Va ser un branu difícil, los movimientos vacacionales, los temporeros nes comarques agrícoles, el reactivar de la economía en xeneral, van poner a prueba otra vegada'l nuesu sistema sanitariu y el personal debe ser consciente que namái una vacuna conducente va poder dar por finada la pandemia. Va ser un branu llargu y duru que sólo nós podemos facer menos tráxicu.
N'otres partes del mundu'l mesmu virus paez más potente. Trump y Bolsonaro compiten n'estravagancia política mientes los muertos s'atropen na cuenta de los sos países. Ayeri yera la fiesta nacional nos EEXX, con reuniones familiares, desfiles y concentraciones per tol país, afalaes dende Washington pol presidente y que van dar como resultáu, posiblemente, una medría ulterior nel númberu de contaxos. Y too metanes la campaña eleutoral presidencial.
La crisis económica que trae'l virus va dexar pequeñes toles anteriores y el presidente norteamericanu llucha por una reeleición que se-y pon cuesta arriba. Los Estaos Xuníos, col so capitalismu xavaz, son a resurdir tres les crisis con rapidez y fortaleza almirables, pero los tiempos, nesta ocasión, faen que too seya estremao. El gobiernu Trump paez más implicáu na guerra eleutoral que na situación real del so país y eso, tratándose del líder mundial, pue tener consecuencies pal restu del mundu.
Los tiempos encurtiénse y les encuestes allarguen la diferencia con Joe Biden, lo que pue llevar a Trump a tomar decisiones radicales pensando en clave eleutoral, con tarrecibles consecuencies pa los demás, tamién pa nosotros, anque lo temos faciendo, pel momentu, bastante bien. Vamos tener que tar atentos.
Raúl Suevos
A 5 díes vencíos de xunetu de 2020
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo