Memoria Histórica selectiva
Hai un parque en Xixón, de nome Belarmino Tomás, qu'honra la memoria del que fuera dirixente de la sublevación d'ochobre del 34 n'Asturies, la que, acordies Hugh Thomas na so "Cartas desde Asturias", deslexitima a socialistes y comunistes pa criticar l'alzamientu militar del 36. Tomás lideró la curtia y sangrina revolución y tamién la rendición a les Fuercies de la República, tres lo que partió pal esiliu; tornó cola guerra incivil p'acabar dirixendo'l "gobernín" asturianu que traicionó otra vegada a la República presidida por Azaña, enantes de colar de nuevo pa esilase en México.
Xixón tamién dedica cais a Dolores Ibarruri y a Santiago Carrillo, quiero suponer que porque nun atoparon nada nes sos estenses biografíes que vaya escontra los principios de la llei de Memoria Histórica, y too ello teniendo en cuenta que se trata d'un ayuntamientu que ta a la que salta. Ye tan conducente velando pol bon nome y la imaxe de la ciudá que yá se plantega retira-y l'avenida al Rei Xuan Carlos, magar que seya'l pá del actual sistema parlamentariu nel que les nueses vides y les de los nuesos fíos se desendolquen, y magar que tol ataque engafentáu qu'anguaño sufre la Corona se base nes declaraciones d'una cortesana de luxu y un comisariu corrompíu. Nun importa que la Fiscalía entá nun abriere la boca.
Ye llamativo que, más amonten los problemes del gobiernu, desastre de xestión gubernamental sanitaria y económica d'un llau y derrumbe total de la imaxe de Podemos del otru, más crez l'acosu sobro la Corona, como si d'esa forma los españoles fuéremos a pasar por alto les cumes de ineptitú ya ineficacia que la clas política de nueso ta algamando. Quiero pensar que la mercadotecnia institucional s'enquivoque nesta ocasión y daquien acabe pasando por taquilla, o, meyor dicho, poles urnes.
España tien una monarquía de chichinabu, económicamente falando; la dotación presupuestaria ye simplemente ridícula. Siempres lo supimos, y siempre ficimos l'exipciu cuando los empresarios mallorquines regalaben un yate, o'l rei Hussein un superchalé en Canaries qu'agora esfruta'l doctor Sánchez. Nunca quisimos saber cómo se pagaba'l rumbu y la pompa qu'una monarquía requier. Tampoco mos estrañábemos cuando'l Rei Xuan Carlos viaxaba acompañáu d'empresarios que llograben xugosos contratos pa les grandes empreses españoles; agora, como Fernando'l Católicu a Gonzalo Fernández de Córdoba, vencedor de Ceriñola, piden-y cuentes, y nun taría mal que SM respondiere coles Cuentes del Gran Capitán.
Mentanto, el nuesu ayuntamientu, tan axilosu pa dalgunes coses, paez escaecer que Asturies ye'l trubiecu d'España y nun alcuentra razón pa que la bandera nacional ondexe nel Muru de San Lorenzo. Ye lo qu'hai.
Raúl Suevos
En Xixón, a 5 díes vencíos d'agostu de 2020
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo