Los pirómanos d'Asturies
Agradecemos al fiscal de Mediu Ambiente d’Asturies,Joaquín de la Riva, que nun quiera «criminalizar a dengún sector» anque, ensin ánimu de desprestixar a la profesión, ye avezamientu de dellos fiscales buscar culpables per baxo les piedres, especialmente cuando les piedres son farto llixeres y escuenden xente feble.
Agradezse, siquesí, que nun quiera criminalizar a los ganaderos, anque llamentamos que nun-y saliere bien al engotiar en que detrás de munchos incendios n’Asturies alcuéntrense los ganaderos. ¡Qué piedra más llixerina atopó l’home!
Marzu, tradición ganadera de quemar; fácil: blanco ya en botella…
¡Llechi! ¿Por qué ye tan común na Alministración plantegar lo fácil, cutir al más feble? La xente d’arriba tien de tar preparao pa buscar lo difícil, p’alcontrar lo complexo, pa llevantar piedronas, porque pa nós que, arrabuñando un poquiñín, la culpa los incendiatos tienla l’Administración. ¿Daquién pensó por qué hai tantu matu nel monte? ¿Quién ye’l responsable de la ¿xestión? del matorral nos puertos? Paezmos que, fai abondos años, esa responsabilidá arramplóla l’Administración a los vecinos; el problema ye que nun sabe cómo se fae’l monte, ni tan siquiera tien oxetivos bien definíos pa organizalu. Cenciellamente arramplólu.
Cuando yeren los paisanos los que lu controlaben, había menos quemes que güei. Comprobóse bien nun estudiu d’hai cinco años que podemos apurrir a quien lu pida. Había menos matos y más pastizal, sin perxuciu de la viesca. Quemábase a tan pocoñinos –una vez establecíu un equilibriu ecolóxicu silvopastoril milenariu y enllenu de conocimientu del tarrén– que nun pasaba nada porque taba’l ganáu correutu nel llugar correutu: güei la reciella equí, controlando los guaños d’artos y cotolles –el llobu y l’Alministración mataren la reciella y con ello semaron matos y mañana les vaques y pasáu mañana, les yegües.
Pero agora son los que nun viven nel monte, y menos entá del monte, los que vienen a deprendenos cómo lo curiar: «Neños, eso nun se quema». Y entós los matos cúbrenlo too pa mal de ganaderos y turistes, de pintores y fotógrafos, de caminantes sin camín –porque enllenó d’escayos–. Col tiempu, ganaderu o non, mal fecho o non, dalguién prende fueu y entós l’incendiatu nun ye piquiñín, sinón grande, porque yá nun son cuatro los matos, sinón cuatrocientos, como les torpeces de los que planteguen ensin coñocer el monte cómo se fae’l monte. Los matos nun son baxinos, non, agora son peraltos, y al llegar a la viesca tamién quemen dalgunos árboles.
En marzu sí, señor fiscal, desátase la «fiebre criminal del pirómanu ganaderu». Pero vamos a esplica-y el porqué: en marzu los tapinos conserven la humedá; les plantes entá duermen; el fueu nun afonda na tierra, nun mata los microorganismos del suelu. En marzu domina aún l’orbayu sobre la ñube; el suelu queda tres la lluvia, nun cae abasnáu pel agua. Amás, en marzu crecen llueu otres plantes pa tapizalo too.
El señor fiscal diz que «si una persona ingresase en prisión por un incendio sería ejemplarizante». Dende llueu. Si un ganaderu ingresare en prisión por un incendiu tradicional, sería exemplarizante, sí. Sería un exemplu del desdexamientu de l’Alministración, de qué mal xestiona los bienes y derechos de quienes-yos pagamos, ganaderos o non. Un exemplu de la falta que fai trabayar dende’l campu pa intentar camudar fonderamente la nuesa Alministración, la nuesa supuesta democracia. Marzu, tradición ganadera de prender: blanco y en botella, a vegaes, señor fiscal, nun ye lleche sinón... ¡horchata foriata (que nin conoz, nin quier, el tarrén que pisa)!
Xuan Valladares Álvarez, voceru del Grupu’l Llenderín: por un Proyeutu pal Agru Ástur, Uviéu
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo