Raitán parleru
Vienme dacuando al cantu la memoria el mio güelu. Pasaren ya añinos asgaya, pero la so imaxe caltiénse ñidia nel mi maxín encesu. Yeren tiempos d’escarpinos, fariñes y palos, medrana y fames. De tienros neños, tuviera de xelada o ficiera un calor afogadizu, los míos ya yeren xente fartuco de llindiar vaques o quedar frayaos semando y sallando. La mayoría tenía un traxe pa los domingos y un par de zapatinos namás, caleyando siempre en madreñes y daqué xostrones. El mi güelu nun ye que tuviera esfamiáu y fuera de pidir, ye que la vida, d’aquella yera de lluxu si conseguíes algamar la condición d’aprendiz n’una factoría o convertite nun guah.ín mineru. Remanar la vida del campu y la nueva vida de operariu especializáu yera futuru curiosín y amañoso. El paternalismu indusrial ye verdá que tamién dióse dafechu n’Asturies, y en dellos llugares espoxigaron cases de cultura y hospitalillos pa operarios, pero la vida yera de curtios horizontes y medios. Güei atopé unes semeyes que toy por donar al Muséu etnográficu rexonal d’Asturies: L’amigu gaitero del mi güelu, tocando la gaita de mozu. La mi prima, sacando del fornu el pan del llar, escenes prestoses d’una dómina de figales y sidra, procesiones y rosarios, silencios duros y muertes, inocencia de xente candial pisando endomingaos los tapinos verdes de praos de romería folixera, al llau de la capiella románica. Turullos, playes con pedreru y “dir secar a Castiella”.
Yo, que soy munches coses y vides al empar, y pescancio el pasáu al traviés d’unes llentes igual un migayu atristayaes, amo fondamente el ragión y el tueru d’Asturies, tamién los tarrezo. Lo que remanez d’aquel tiempu de cuchu, folixa y esfociada xera ye un horru esgonciáu llantáu na quintana, una alcordanza de paisanos con chapeta y tratu de valir. Una pesllera con ferruñu, una fonte, requexín de mofu y llimiagos, marmullante y seldañosa, escenariu afayaízu del cortexu los míos güelos. Unes caleyes pindies de xente que ya tuvo fíos que yos-salieres inxenieros o mayestros y marcharon. Dexando atrás viesques comunales, raitanes, formientu y xatinos. L’atapecer d’un mundiu tan piquiñín y humildoso como enllenu intrahistories, ayalgues guapines y melgueres. De cuentos d’homones del sacu y muyeres asturianes de munchu remango y arte, de caseríes y families grandes faciendo comuña. Sestaferia, rises de neños, muertes prematures de fíos y afalagos de güelinos de pelu de cuayada y mayuca piel, testigos d’una Asturies que allumó el camín xusto, y nun se merez solo escayos y que faigamos risión d’ella.
José Luis López Tamargo
Oviedo
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo