Sigue xingáu'l Perú
Entrugábase'l protagonista de "Conversaciones en La Catedral", una de les grandes noveles de Mario Vargas Llosa, por "cuándo se xingó'l Perú" y, dende entós, muncha xente faise la mesma entruga ensin atopar respuesta pa una situación, la d’esti país, que paez nun tener fin.
Nestos meses caberos el Perú tiense averao a la nuestra cotidianeidá por algamar unes cotes tarreciblemente negatives na llucha escontra la pandemia, como dalgún de los sos vecinos del continente americanu, y como nós mesmos, cabría añeder. En medio d’esa voráxine'l país andín tevo que trepar con una crisis política nueva, la enésima, y unes eleiciones presidenciales que vieron algamar la victoria a Pedro Castillo, por un garapiellu de votos, sobro Keiko Fujimori.
A España nun paecen importar-y muncho les coses del Perú, pero dalguna d’elles puédenos llegar, como parte de la coca que se cultiva y procesa nel VRAEM, acrónimu que nasconde a los valles de los ríos Apurimac, Ene y Mantaro, esti caberu, por un casual, oxetu d’entruga ensin respuesta va non mucho nel programa “Pasapalabra”. Un valle que s’alza como primer productor mundial d’esi productu malditu.
El señor Castillo, de profesión maestro rural, aporta a la Presidencia como resultáu d’una situación inesperada -a nós yá mos asocedió con Zapatero-, pos el líder del so partíu, Perú Llibre, un estalinista de nome Vladimir Cerrón, nun podía presentase a les eleiciones por tener causes xudiciales pendientes, y llantólu a él cola intención nidia de tutelalu posteriormente. Una situación clásica que suel xenerar fuertes dolores de cabeza ya inestabilidá política.
El señor Castillo dame mieu, confiésolo. Nos díes caberos tiense despachao con declaraciones tranquilizadores tocantes les sos intenciones polítiques pal futuru viniente, y ye que les campañes electorales en Perú, fondamentalmente populistes, nun dan pa facer muncha prospectiva, tampocu les promeses. Eses manifestaciones resúltenme calcaes a les que facía Hugo Chávez recién ganaes les sos eleiciones primeres en Venezuela. Y yá ven cómo ta esi país.
Castillo quier una Constitución nueva, y eso tamién me preocupa; coles mesmes pretende desarrollar un sistema de milicies populares, qu’ellí llamen rondes, una iniciativa que nació por pura necesidá en tiempos de Senderu Lluminosu y qu’agora paez ser la base pa daqué más fonderu y peligrosu. Vamos ver cómo acaba.
Güei, na so toma de posesión, descolgóse con un discursu indixenista cargáu de perles antiespañoles, col rei d’España ellí presente, y reivindicación d’un pasáu feliz precolombinu que yá namái utilicen los populistes nacíos y desarrollaos na precariedá intelectual y política, amás de la social y económica. Cerrón, el so tutor, d’ideoloxía castrista más que comunista, va emburriar haza la radicalidá y Castillo, ensin sofitos na Cámara, va navegar ente esa pulsión y la de la realidá peruana. Pue ser una travesía tempestosa.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo