Camín de San Pedro
Taba esta mañana de sábadu lluminosa pero con una daqué d’airiquín de Noroeste que se facía sentir na cara. A la xente nun paecía importa-y, depués de los díes caberos de llovíu l’oxetivu yera tomar l’aire y tantu’l Muru como la sablera de San Lorenzo yeren pastu de pasiantes y perros colos sos amos.
A min, al altor de la Escalerona, siempres se me va la vista a esi preciosu monolitu art decó, col so termómetru y el so reló, tamién col so mástil cola bandera xixonesa, y nun puedo nun dexar de pensar lo bien que lluciría ehí una bandera española, más agora que los carbayones mos tienen pisao la maguera col banderón que llantaron na Escandalera. ¡Qué gulisma!
El casu ye que, tres esi soliloquiu, salme a manzorga, viniendo del aparcamientu soterráneu del Náuticu, una primorosa familia que, a xulgar polos sos vestíos, diríxese a una boda, que después voi comprobar qu’en San Pedro. Ellos van d’azul, él de traxe y ella, nun pude nun dexar de güeyar, con pantalones azules cubiertos por daqué paecío a una falda llarga aparentemente abierta per delantre y un cuerpu de vestíu con espalda descubierta y tirantes. El fríu facía que s’intentara cubrir con un chal llivianu a xuegu que duldo que sirviere pa muncho.
Lo meyor de la estampa cumplía-y a la neña, quiciabes 3 años: diba de la mano de dambos proxenitores y yera una maravía. Una rubia con tirabuzones con un vestidín que nun dexaba ver una increíble capa con capucha de color burdeos, a xuegu coles medies de la criatura. Asolutamente encantadora, la neña y la imaxe de familia moza.
Que nun m’enquivoco atestígüenlo les numberoses vueltes de tiesta de los que veníen en dirección contraria, particularmente les muyeres, lo que me dexa la dulda de si lo facíen pola madre, de la que nun puedo dicir si l’escote yera similar a la espalda, o si la so belleza correspondía al físicu, qu’ensin dulda yera muncho. El casu ye que, llegaos al Ayuntamientu, yo tiré pal muelle y ellos pa San Pedro.
La cosa quedaría en simple lloría, pero dexóme con bon ánimu, pues venía de lleer que los divorcios n’España van como’l covid, en franca epidemia, y que los nacimientos retroceden, especialmente n’Asturies, au con eses premises la población retrocede y envieya a un ritmu que paez imparable.
Nel espigón de Lequerica, viendo la playa de Poniente enmarcada pel macizu del Aramo coles sos nieves primeres, acordéme de que’l mio amigu Chema vien de ser güelu d’una Allegra, mitá cántabra, mitá catalana, y la mañana fízose entá más espléndida.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo