Gastronomía pa un futuru
Cuando’l turista sal per primer vegada a paseyar pela Habana Vieya, davezu peles cais que’l gobiernu de la ciudá foi recuperando y afechando pal refalfiamientu, y engañu, habría qu’añader, de esos visitantes foriatos, puesto qu’en munchos casos la cai qu’escurre paralela ye una auténtica imaxe d’ablayamientu; el “yuma” percibe n’algunes de les esquines un vieyín aveyuscáu que-y ofrez a la venta el númberu caberu del “Gramma”, el muérganu de difusión y adoctrinamientu del Partíu Comunista cubanu. Vénde-ylu al preciu que marca’l periodiquín, malapenes una fueya parroquial d’ocho páxines, cola salvedá de qu’él cómpralo en pesos cubanos y véndelo en pesos convertibles al turista, esto ye, una ganancia de 24 vegaes que ye/yera’l cambeu ente les dos monedes. El vieyín va comer bien esi día y el turista marcha contentu col “Gramma” pal so país. Dellos númberos vieyos y señalaos mérquense nel mercáu del llibru vieyu de la plaza d’Armes por un bon garapiellu dólares.
El “Gramma” respuende a lo qu’ún espera de semeyante artiluxu nun país totalitariu, de dictadura feroz, al que namái defenden anguaño cuatro comunistes tresnochaos, o interesaos, como los españoles qu’allegaron la semana cabera a validar les eleiciones d’Ortega en Nicaragua. ¡Qué vergoña! Güei, víspora de la gran manifestación cívica convocada en Cuba pola disidencia, y prohibida pol réxime, nun pude resistir la tentación d’echa-y un güeyu y atópome con que la primer páxina dedícase a prohibir, dende la glosa a los “versos cenciellos” de Martí, la venta y eshibición de roses y sábanes blanques. Exactamente los símbolos que se pidieron que luzcan los manifestantes. Esi ye’l nivel d’esti feudalismu nuevu instauráu polos Castro, y esti ye’l réxime que los que se llamen progresistes n’España s’escusen de condergar y sofiten col so silenciu cómplice. Ye lo qu’hai.
Anguaño, esisten dellos medios dixitales pa siguir la realidá cubana, unos meyor qu’otros, unos más infiltraos qu’otros, pero que son, ensin dulda, muncho más precisos que’l “Gramma”. A min préstame “14ymedio”, enantes nomáu “Generación Y”, y al traviés de los sos güeyos y teclaos, y la mio esperiencia de vieyu vecín de L’Habana, voi faciéndome una idea de cómo van les coses per ellí. Y van de mal en peor, como marquen y denuncien les cifraes de balseros que la guardia costera yanqui detién enantes d’aportar a la Florida, o como apunten los que muerren atravesando’l Darien, o los que lleguen a l’anguaño impenetrable frontera mexicana. Nos paraísos comunistas, y na actualidá vémoslo n’Hispanoamérica, vótase colos pies, escapando, o intentándolo, al preciu que seya preciso pagar.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo