La Custión Agraria Asturiana
Esti día 29 d'avientu de nueves l'Asturies agraria salió a les cais d'Uviéu protestando pol so abandonu, y faen bien en protestar, pues ye yá inalmisible l'escaezu a que les instituciones someten al mundiu rural, mas, reflexonando sobro l'asuntu, entrúgome si nun tarán escosándose en baldre les yá débiles enerxíes del nuesu campu. Si ún espera a qu'instituciones como les nueses, sucursalistes y tímides, dean un pasu al frente movíes pola presión de glayíos y cencerraes pue atopase esperando un llargu tiempu.
Son munchos los problemes qu'enfrenta'l mundiu rural, pero ¿son problemes solo del mundiu rural o d'Asturies entera? Creo que ye bien obvio que dende'l poder nun s'entienden les necesidaes del nuesu campu. ¿Nun equival eso a nun entender Asturies? ¿Nun son midíes como la cuota llechera o aquella infame normativa que pretendía alloñar les cuadres 500 metros de los núcleos poblaciones una afrenta a la nuesa soberanía? Son, a fin de cuntes, midíes que se diseñen pa otros países con otros contestos que nun concasen col nuesu, llueu fai falta un poder asturianu que diseñe midíes por y p'Asturies, n'esta y nes demás materies. Per otru llau ¿Nun ye'l mal estáu de les comunicaciones nel occidente y l'oriente un problema que debiera esmolecenos a tolos asturianos? ¿Nun se solucionaría con inversiones mayores n'Asturies, con una política coherente d'infraestructures que vertebre'l nuesu territoriu y qu'atienda a los nuesos pruyimientos?
Pasó yá la época del carbón y del aceru y creo que ye'l momentu d'escuchar tamién a los otros asturianos, apartaos y escaecíos, pero que caltienen esta tierra col so trabayu y mugor. Ye'l momentu de dexar pensar n'Asturies non como un centru con ales y volver de nueves a concebila como una unión múltiple y policéntrica de conceyos.
Sofítese l'agrarismu nel asturianismu y atopará ésti la manera d'universalizar, d'asturianizar, les sos necesidaes y de falar con voz propia, con voz asturiana. Sofítese l'asturianismu nel agrarismu y, seique, atopará la manera d'anovase y de calar nel corazón de los asturianos. Xuntos nun mesmu ser quiciabes tendremos la fuercia pa entrar nes instituciones o, a lo menos, pa obligales a que mos escuchen, a nós, a los asturianos.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo