La inquisición nueva
Fo'l presidente Clinton, créome recordar, el que mos fizo pensar per primer vegada nestes coses con aquello de la "afirmative action"; esto ye, la seleición de candidatos pa les instituciones del gobiernu en función de sexu, raza, creyencies o nacionalidá, naquelles estayes nes que podíen tar sorrepresentaes eses carauterístiques sociales. Una iniciativa a la que, d'entrada, yera mui difícil oponese. Dende entós la situación tien evolucionao y, nalgunos casos, podríemos pensar que tamos a puntu d'algamar un puntu de paroxismu tiránicu nesta situación.
De la "afirmative action" pasamos, en xeneral n'occidente y particularmente nel mundiu anglosaxón, a daqué que s'avera munchu a la tiranía de les minoríes. El pensamientu o cultura woke, "espiertu", fo lo viniente. Un movimientu qu'anima a tar sollerte énte les inxusticies sociales basaes tamién nes premises enantes citaes, daqué a lo que ye difícil tamién pone-y pegues si partimos de l'asunción de que la evolución humana, tanto no individual como no coleutivo tien de tender haza la perfeición.
Asumíos estos presupuestos, particularmente nos templos del saber que son les universidaes, aportó'l momentu d'aplicalos de forma práutica, y eso fízose de la mano de los conseyos y comités encarregaos de vixilar pola aplicadura de los criterios D-I-E, esto ye, diversidá, inclusividá y equidá; un rasgu que los so valires principales vien marcáu pol acrónimu BIPOC, correspondiente a negru, indíxena o xente de color, característiques que dan preferencia nesos, enantes, templos de la llibertá d'opinión y pensamientu, perriba de les capacidaes.
La exacerbación anguaño de les tensiones sociales norteamericanes, llegaes de la mano, ente otros fenómenos sociales, de movimientos como'l "me too", o'l "black lives matter", tán convirtiendo a les universidaes en campos de caza escontra aquellos qu'osen disentir de la opinión güei imperante, dándose'l casu d'abandonu, énte l'acosu, de figures importantísimes del pensamientu y la docencia que se sienten hostigaes, más allá de lo que tán dispuestes a soportar, pola intolerancia anguaño reinante. El resultáu nun pue nu ser otru que'l probecimientu intelectual de les universidaes, daqué que recuerda enormemente a los resultaos algamaos pola Inquisición sieglos va. Esto ye especialmente llamativu y dolorosu nel casu de feministes de siempres, refugantes énte l'imperiu de lo tresxénero. Ye lo que hai.
Los valtaos d'estatues a lo llargo y ancho del mundiu anglosaxón, y tamién n'Hispanoamérica, por motivos estremaos, van pol mesmu camín y sollerten nidiamente de lo que mos vien. Anque la semana cabera, nuna universidá británica, yá s'algamó un nivel inimaxinable va bien poco cola inclusión del "1984" d'Orwell nel rexistru de llibros peligrosos pa los escolinos; situación paradóxica pa una obra maestra que sollerta escontra'l pensamientu únicu, les neollingues y el totalitarismu en xeneral.
Quiciás el nuesu futuru seya "un mundiu feliz" huslianu vixiláu pol "Gran hermanu" nuevu, o quiciabes habría que lleer a John Stuart Mill y el so vieyu "On the liberty" pa tentar d'evitalo.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo