Na Porta Nigra de Tréveris
Va dellos años tevi la oportunidá de pasar un fin de selmana na monumental ciudá alemana de Tréveris. Enllena de curiosos restos históricos que van dende la imponente basílica de Constantino, posiblemente l’edificiu de ladrillu más vieyu entá n’usu anguaño nel mundiu, hasta’l más recién y humildosu muséu de la casa natal de Carlos Marx, onde ye posible entretenese viendo les carauterístiques de los variaos especímenes del xéneru humanu qu’a él acuden en reverente procesión.
Hai munchos más elementos d’interés na ciudá, y tamién ye posible complacese, aquellos que seyan a escaecer el diañu del colesterol, col potente codillu o la rumbosa chucrut. Pero a min lo que más m’impresionó fo la Porta Nigra, quiciabes la más grandona y ablucante de toles construyíes pol Imperiu romanu y aínda güei toa ella en casi perfeutu estáu. Nun yera pa menos, ellí taba la última llende xermánica y había que defendela a tou trance.
Construyéronla, dicen, nel añu 180, cuando entá quedaben unos cuantos pal esbarrumbe final, y cuando yá facía tiempu que los romanos emplegaben a xentes de los pueblos sometíos como tropes ausiliares, como los astures, pero aínda nun entamaron cola contratación de pueblos enteros de bárbaros pa que-yos ficieren el trabayu. Eso aportó cuando los romanos se ficieron mantegones y ociosos, escayentes, cuando morrer por Roma yá nun yera interesante. Ehí entamó la cayida.
Esta selmana va celebrase una cume ente Europa y la Xunión africana en Bruseles pa tratar de ver cómo enriar los problemes de seguridá na rexón. A ella nun van ser invitaos cuatro países sahelianos de recién subvertíos pente medies güelpe militar. Tampocu va acudir Rusia, que col grupu Wagner, empresa global de mercenarios, vase estendiendo pol territoriu; nin vamos ver representación china, el gran inversor económicu na zona, con contratos draconianos que van acabar d’hipotecar el futuru d’esos países; nin muncho menos los grupos yihadistes qu’afaren cada día estayes más grandes de la rexón. Van dir los de siempres, y vamos tratar d’igualo como siempres, con perres pa los oligarques y misiones d’instrucción y adiestramientu de los exércitos de la zona.
Yá nun tenemos Portes Nigres, nin lexones que les vixilen, o, cabría dicir, voluntá d’emplegales, y ca día, como asocediera va dellos sieglos a los romanos, vemos cómo, d’una forma o otra, el Limes faise más porosu y por él lleguen grupos de desheredaos que la so imaxe alloñase de la d’aquellos bárbaros pero que nun son más que l’heraldu de la cayida del Imperiu européu, acosáu como entós non polos enemigos exteriores, sinón pola propia escayencia. Ye lo qu’hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo