Biden ta de vuelta
L’aportar del presidente Biden a la Casa Blanca ye ensin dulda una de les más sopelexantes que recuerda la historia de la xoven república norteamericana. Una perriñía engarradiella eleutoral col cafiante presidente en cargu, Donald Trump, y los resultaos nun aceutaos por esti dieron pie pa que milenta siguidores del mal perdedor, con mayoría de supremacistes de tipu estremáu ente ellos, asaltara la sacrosanta see de la democracia estadounidense, el Congresu de Washington. Ún de los díes más escuros d’esa gran democracia y, pol momentu, líder mundial.
Los primeros meses de la so Presidencia viéronse aborronaos pola mala xestión de la retirada d’Afganistán, desastre nel que cooperaron, caún al so nivel, la mayoría de naciones implicaes naquella desgraciada operación, incluyida la de nueso. Les imaxes del aeropuertu de Kabul paecían destinaes a formar parte de les desgracies gráfiques del gran país, xunto a les Torres Ximielgues y el propiu Congresu. Yera l’anunciu, pa munchos analistes, d’una Presidencia probablemente fallida. Güei la imaxe del presidente Biden paez otra.
La xestión de la crisis d’Ucrania, agora yá invasión, paez que foi más qu’aceutablemente llevada por él, a lo menos pol momentu. Per primer vegada, la intelixencia yanqui foi desvelando les informaciones sobro lo que faría’l rusu Putin con dellos díes d’avance, daqué novedosu por cuanto la teoría previén de facelo pol peligru que supón pa les fuentes. Nun-y importó un res a Biden, qu’al facelo tamién arriesgaba la so credibilidá nel casu de que los rusos nun atacaren. La invasión permitió-y tornar énte los sos conciudadanos y socios n’Occidente como daquién que sabe perfeutamente lo que lleva ente les manes.
La posición de Biden llégamos como una amuesa de prudencia y enerxía al mesmu tiempu, poniendo n’evidencia la deriva de Putin, que recuerda peligrosamente a l’actitú de Hitler nos periodos previos al estallíu de la Segunda Guerra Mundial. Les sanciones económiques, con caráuter nidiamente progresives, y qu’anguaño anunció dende Washington dexando pa meyor ocasión la espulsión rusa del sistema Swift, ye probable que nun supongan efeutos inmediatos, sinón a mediu y llargu plazu, pero los socios de la OTAN, a los que se tien referío Biden repetíes vegades mientres la so conferencia de prensa, ye seguro que se van sentir reconfortaos al apreciar que esiste un líder n’Occidente que ta dispuestu a responder en tiempu y forma a los abusos y desprecios a les más elementales normes de convivencia internacional que Putin ta llevando a cabu, y ello con independencia de que dalgunos quisieren ver a la OTAN entrando nel oeste d’Ucrania.
Nun podemos, desgraciadamente, esperar nada de NN XX col bloquéu del so Conseyu de Seguridá y la so historia d’inoperancia cada vegada qu’una de les grandes potencies ta implicada nel problema, y, mientres Bruseles fai cábales, quédamos l’alegría de ver que Biden, qu’achacó la limitación nes sanciones a los socios europeos, ta de vuelta y ye lo único a lo que podemos agarranos agora. Aunque nun seya muncho.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo