Ensin loxística nun hai victoria
Nel sieglu XIX rellumó con intensidá especial el xeniu de Napoleón, hasta siete coaliciones de la mayor parte de los países europeos foron necesaries hasta algamar a derrotalu definitivamente en Waterloo. Lo qu’escapa na mayoría de les llectures ye que nun foi Wellington quien verdaderamente lu derrotó, sinón el créditu bancariu, que s’atopaba sobretoo del llau británicu y permitía-yos dotar económicamente a los derrotaos reinos europeos y, colos sos dineros, armar exércitos nuevos, hasta que, finalmente, derrotaron al Emperador y una emprobecida Francia. Siempres ye la economía la que manda nes guerres y, derivada d’ella, la loxística fondamenta les victories nes batalles.
Na primergGuerra del Golfu llevóse la victoria y el pase a la Historia’l norteamericanu xeneral Schwarzkopf, pero fo la dilixente y previsora aición del xeneral Willian Pagonis la que punxo, en tiempu y forma, non solo les tropes, sinón tamién los medios de combate y tolo necesario pa sofitar y caltener nel tiempu’l ritmu de la guerra, esto ye, la loxística, ensin la cuala dalu xeneral alcanzará nunca la victoria. Pregúntome, énte la situación n’Ucrania, si los xenerales de Putin la estudiaran abondo, y les imáxenes qu’aporten hácenme pensar que non.
La invasión d’Ucrania tiense convertío nun problema de loxística, o eso paez. El cercu de Kiev, aparente oxetivu principal de la ofensiva, nun acaba de completase porque les dos exes, este y oeste, qu’a ella conducen, nun acaben de ser segures gracies a l’aición ucraniana; amás, les víes, de non muncha capacidá, vense atascaes por vehículos destruyíos o simplemente bloqueaos por avería o falta de combustible. La necesaria reposición d’unidaes por esgaste de combate paez que nun s’está realizando, y fálase de carencies notories na llegada de repuestos, combustibles, municiones o la más simple alimentación de los combatientes. La imaxe que se percibe en medio de la borrina informativa anguaño dexa’l prestixu del Exércitu rusu abondo tocáu, y nun paez que puedan entamar l’ataque final hasta que les dos exes mencionaes s’atopen nel so poder y cola necesaria seguridá pa permitir el fluxu loxísticu. Hasta entós nun se va poder piesllar el cercu de Kiev.
Pue paecer que la loxística namái se preocupa de los materiales, pero ye muncho más qu’eso; en realidá, ye la rama de la ciencia militar que más afeuta a la moral de les tropes, elementu que, a lo llargo de la historia, supunxo la clave pa la victoria final. Ye lo qu’hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo