De Bello Ucraino
Los mozos de les xeneraciones nueves, nel campu del conocimientu, tán cada vegada más güérfanos d’elementos que, na mio opinión, complementen, ya inclusive sofiten, lo que va ser la so personalidá d’adultos. La pauperización, de nuevo según el mio criteriu personal, de los planes d’estudiu nun paez una premisa bona que conduza a grandes realizaciones. Ye lo qu’hai.
El llatín yera una asinatura clave na mio dómina, y la traducción de “De Bello Gallico”, la gran obra de Xulio César, solía trayenos de tiesta, con resultaos tan chuscos como aquel inolvidable “César d’una ostia mandó los soldaos al puertu”, en llugar del correutu “César unvió los soldaos al puertu d’Ostia”. Pero, a la fin, quedaben delles idees, como’l posu la sidra nel fondu la botella, y asina entá recuerdo lo asocedío nel cercu d’Alesia.
Ellí César, colos sos lexonarios, llevó a cabu una obra d’inxeniería increíble. Construyó un muru en redol al “oppidum” galu qu’enzancaba les salides de los homes de Vercingetorix, y tamién el so abastecimientu dende l’esterior, lo que debería llevar a la rendición por fame. Pero fo más allá: decatóse de que podía ser atacáu por otres tribus gales dende la retaguardia, asina que construyó otru muru en redol al primer. Esto sedría la clave de la so victoria final cuando los galos contraatacaron. Depués vendría el pasu del Rubicón, pero eso ye otra historia.
Estos díes asistimos, dende casa, al intentu de les fuercies ruses por cercar la ciudá de Kiev, capital d’Ucrania y aparente oxetivu principal de la invasión. Una operación que ta costando más tiempu del que cabía esperar al entamu de les operaciones y que ta poniendo n’evidencia les faltes de tou tipu na máquina de guerra de Putin. Pero too fai pensar que ye una cuestión de tiempu y que, al final, van algamar a piesllar el cercu sobro la ciudá.
Una vegada activada la trampa, paez lóxico pensar que va siguir una llarga y tremenda preparación artillera con tolo que podieren acumular nes sos posiciones. Va siguir l’asaltu de la Infantería nun llargu ya inciertu combate en población que nunca ye fácil y sí mui costosu en baxes pal atacante; pero ye equí cuando me vienen a la memoria los “Comentarios” de César y nun puedo nun dexar de pensar que, hasta agora, les fuercies ucranianes vienen desempeñándose mui bien en pequeños combates na retaguardia y víes loxístiques de los rusos.
¿Lleería daquién ellí “De Bello Gallico”? Quiciabes l’enseñamientu nesti casu seya más necesariu pa los rusos, pos los ucranianos tienen fama alquirida d’antiguu na guerra irregular y de guerrilles.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo