La baldadura de la patria
Confieso que me dolió. Esperaba que la señora Robles, al cabu de toa una vida de servicios al Estáu, taría al altor de les circunstancies y defendería, a costa de lo que fuere, a otra servidora de la nación, a la direutora del CNI. Pero nun foi asina; entregó la so tiesta, porque asina la solicitaben los enemigos declaraos d’España, ensin malapenes pestañear. Y a mi dexóme afaráu. Y yá nun tengo edá pa emigrar.
La traxicomedia de la intervención de los teléfonos de dalgunos independentistes, cola bendición del xuez residente del Tribunal Supremu, convién nun lo escaecer, nun se sostién baxo dalu puntu de vista, sacantes el del caltenimientu, al coste de lo que seya, del titular de la Presidencia del Gobiernu d’España nel so despachu del palaciu de la Moncloa. Ye un sacrificiu, el de la direutora del CNI, que va trayer cola en cuantu qu’exemplifica’l valor que tien la entrega al serviciu pa quienes dirixen los destinos de la nación, ya invita a los que vienen detrás a midir el nivel d’implicación y comunión col gobiernu de turnu. Demoledor.
Ye quiciabes la divisa que relluma na puerta de los cuarteles de la Guardia Civil y del Exércitu, esi “Too pola patria”, la meyor y más sintética forma de declarar lo que supón el serviciu a España; a lo menos, yo nun conozo otra meyor. Y quiero pensar que la saliente direutora del CNI, toa una vida de serviciu nesa institución, asina lo entendiera siempres, inclusive agora, nestos momentos perdifíciles de la so vida profesional. Tamién creo que la señora Casteleiro, sucesora de só y funcionaria tamién de la Casa, tien crecío nos mesmos parámetros de serviciu qu’ella; pero ye imposible dexar de llau la perceición que toos tenemos de que se ta entregando la tiesta del Bautista al caprichu malintencionáu d’una baillarina que nun contrataríen nun cabaret de tercera categoría. Ye lo qu’hai.
El mensaxe subyacente de toa esta historieta ye que too val col envís de caltener el poder. Toos tamos al serviciu, non de la patria, sinón de los intereses del individuu que llega a ocupar el palaciu monclovita; nin siquier del partíu que lu sofita, cada vegada menos xenerador de doctrines sociales y más simple apoyu del políticu de turnu. Ye una situación deplorable qu’ensin dulda va tener consecuencies morales fonderes pal colectivu que se llama España. Precisamente cuando nes llanures ucranianes vemos cada día’l significáu del conceutu “nación”.
El “conformase con facer lo xusto del so deber, ensin que la so propia voluntá adelante cosa dalguna” paez una opción bona pal funcionariu anguaño, pero, con ello, cada día que pasa avanzamos na demolición de la patria.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo