La dignidá de los vencíos
Los medios de comunicación bombardéenmos tan intensamente con imaxes -símil obligáu dada la circunstancia ucraniana- qu’en pocu tiempu esmorécense énte’l pesu de les qu’aporten en díes vienentes. La d’ayeri, pa min, taba nesa columna d’homes y muyeres -equí sí que me paez imprescindible y obligao usar el llinguax inclusivu- qu’avanzaban per una llarga, amplia y desolada avenida pa entregase a los soldaos rusos. Yeren los defensores de l’acería d’Azovstal, en Mariúpol, los héroes más bultables, ente otros munchos, d’esta carnicería en que se tien convertío la invasión rusa d’Ucrania.
La guerra ye en sí mesma un de los aspeutos más tarrecibles de la condición humana; y n’Antigüedá, énte la falta de comunicación pública, yera difícil tener noticia de lo qu’asocedía. Magar too ello, la historia tráxonos el rellatu de dellos episodios particularmente bederres, especialmente cuando se trataba d’asedios, como fo’l casu de la cayida de Xerusalén a manes de los cruzaos, o Constantinopla baxo la cimitarra otomana.
Nos tiempos modernos, pienso nel sieglu XX, los oyentes entamaron a tener noticia puntual, más o menos manipulada, de lo qu’asocedía, y, por exemplu nel nuesu casu, l’asediu al santuariu de la Virxen de la Cabeza, defendíu por fuercies de la Guardia Civil, o la defensa feroz del bastión del Mazucu, n’Asturies, polos combatientes republicanos, foron oxetu de siguimientu continuáu y dieron cuenta de la grandor de los defensores de dambes posiciones. Suelen ser los defensores, supuestamente n’inferioridá, los que ganen el favor de la opinión pública en casi toles situaciones.
En Mariúpol, gracies quiciabes al Starlink d’Elon Musk, pudimos contemplar les condiciones espantoses en que se desenvolvíen defensores y families. Imposible nun tomar partíu por ellos, por más que dalgunos quisieran presentanos a los heroicos miembros del batallón Azov como filonazis, y a min, personalmente, tiénenme paecío la meyor espresión d’amor a la patria qu’Ucrania podía atopar.
Ayeri, siguiendo órdenes del mandu, entregaron les armes y rindiéronse. Desfilaron ordenadamente pa ser cacheaos y conducíos al cautiveriu; y nun se m’escapa que, en tiempos pasaos, lo ficieren desfilando con bandieres esplegaes, al toque de tambor y portando les sos armes. Yeren tiempos en que la guerra, esa espresión tarrecible de les rellaciones polítiques, conducíase con honor.
Dicen agora los rusos que van convertir Mariúpol nuna ciudá de vacaciones, daqué asina como un Port Aventura a lo ruso, que nun sé esactamente a qué se pue paecer; anque, mirando a Viborg, l’antigua y perrica segunda ciudá de Finlandia, puertu con munchu puxu del Bálticu hasta que los soviéticos s’apoderaron d’ella, podemos facenos una idea, puesto qu’entá se pueden visitar les ruines, nunca recuperaes, de la guerra; y anguaño sobrevive principalmente del turismu finlandés, qu’aínda llora pola perdida Carelia. Ye lo qu’hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo