Los muertos rusos tienen los güeyos rasgaos
Nel entamu de la invasión d’Ucrania, a min, que soi interesáu y tengo un pocu de deformación profesional, intrigábame’l fechu de que los soldaos que marchaben subíos sobro los carros y tresportes blindaos rusos tuvieren, na so mayoría, los güeyos rasgaos; anque, confiésolo, nun-y di mayor importancia nel so momentu.
Güei apórtame un mapa interactivu d’una fonte de Telegram, cuya fiabilidá desconozo, pechalbeda200, na que s’amuesa l’orixe rexonal o provincial de los muertos na campaña ucraniana pel llau rusu, y el coloríu cuadru paez tener un bon sofitu na lóxica del país y de les sos Fuercies Armaes.
L’Exércitu rusu anguaño -enantes coloráu, depués soviéticu- nútrese de dos tipos de reclutes: los de reemplazu obligatoriu, la nuesa mili tradicional, que, como asocedía n’España nos años caberos de la so esistencia, saca la mayoría de los sos mozos soldaos del mediu rural, con poblaciones pequeñes onde les parabanes pa evitar el serviciu tienen mala prensa y el nivel d’estudios, qu’alimenta les prórrogues, ye inferior al de les grandes ciudades, y el profesional, pente medies de contratos de tipu estremáu y que tamién recluta la mayoría nes provincies llonxanes d’Oriente por motivos similares a los del serviciu obligatoriu, a los que cabría amestar que la escasa renta económica d’eses rexones lleva a que los sos mozos, como tien asocedío siempres a lo llargo de la historia y en toles partes del mundu, seyan más gustantes a guetar una meyora social gracies a la carriera de les armes. Ye lo qu’hai.
El resultáu ye esi mapa d’espresivos colores nel que resulta especialmente llamativa la situación de les provincies de Moscú y San Petersburgo, les dos grandes capitales ruses, con la menor tasa de baxes de combate na invasión d’Ucrania magar ser les rexones nes que, ye un suponer, la presión de los medios de comunicación, y de la propia clas política, sedría más potente y, poro, supuestamente más conducente.
De lo anterior cabe deducir qu’en Rusia tol que tien medios económicos o informativos procura escaquease del Exércitu, una organización que siempres tevo mala fama en rellación col maltratu de los reclutas pero que güei, superando en tres meses les baxes de combate del Exércitu soviéticu en nueve años d’espliegue sangrientu n’Afganistán, tiense convertío na meyor razón pa que los mozos que tengan posibilidá emigren de Rusia.
Putin ye un gran problema pa Occidente, pero yelo aínda mayor pa la so xente.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo