Esbarrumbu, desaniciu y desacatu a la Constitución en Carreño
Escribo esta carta a la direutora col envís de denunciar públicamente y dar a conocer al públicu llector, na midida les mios posibilidaes llimitaes, la estroza patrimonial cola qu'el Conceyu Carreño (FSA-PSOE) nun tien problema en dar rienda suelta nel exerciciu les sos competencies, como asina pudi conocer tres d'una visita recién al xacimientu neolíticu'l monte Areo y el so entornu etnográficu. Ello al marxe la situación d'abandonu o dexadez yá de por sí del área recreativa, les infraestructures y los llugares monumentales, lo qu'en sigu mesmu yá ye daqué ciertamente llamentable. Sicasí, la deceición tórnase n'indignación, impotencia y rabia cuando, tres de la visita a la necrópolis, ún pue comprobar cómo una casa mariñana tradicional asturiana de doscientos años d'antigüedá, conocida col nome de "Los Carros" y allugada tres de la ermita los Remedios, a les faldes del monte, yá nun existe, magar tar tovía indicada na guía turística, al ser vítima de la construción d'un xalé particular de nueva planta.
Asina foi que, indignáu de ver tal destrución del patrimoniu, nun pudi sinón unviar la correspondiente quexa al Conceyu, del que hai que reconocer que con toa sinceridá y esparpayu, respondió allegando que, cito testualmente, "se remodeló con todos los permisos en regla por parte del dueño" (sí, "remodelación" llamen a valtar dafechu una casa y reedificar sobro ella un xalé nuevu). Ye dicir, qu'el propiu Conceyu, que recueye dichu bien patrimonial nes guíes turístiques de que da entrega a los turistes pa que lu vaigan visitar (ye un dicir, yá que nel centru receición del monte Areo nun hai nin un triste folletu -dicha guía ties que te la imprimir na páxina web del Conceyu Carreño- nin dengún trabayador, tando dicha instalación a cargu eventualmente de la chigrera qu'ellí al llau trabaya) permite que s'esbarrumbe y faiga desapaecer una xoya'l patrimoniu rural asturianu, de les que queden por desgracia bien pocos exemplos, y acaldía menos al tenor de les polítiques culturales y de conservación de les nueses alministraciones.
Por desgracia, como pudi saber poco dempués de la visita, nun ye l'únicu casu desaniciu patrimonial que tán permitiendo les autoridaes conceyiles. Asina ye'l casu les centenaries cases García Busto de Perán, casu denunciáu públicamente pola oposición y los vecinos. Una vegada más, tan solo una más, en qu'el Conceyu Carreño, como tantos otros, permite, nesti casu a la Direición de Costes, atentar escontra'l patrimoniu, dalgo que ta recoyíu como delitu penal na propia Constitución Española nel so artículu 46, el mesmu que obliga a los poderes públicos a la so debida "conservación", asina como a promover el so "arriquecimientu". Asina cuiden les nueses instituciones del nuesu patrimoniu cultural.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo