Arde Troya
La mayoría del personal tien perfeutamente definida la imaxe de la vieya ciudá griega del Asia Menor amburando pelos cuatro costaos. Unos, los menos anguaño, dende les llínees de la lliteratura épica d'Homero, y los más dende les más afayadizes y cencielles imaxes del cine nes sos estremaes dómines, pos les histories de la bella Helena o'l heroicu Aquiles dan, dieron y van dar muncho xuegu a guionistes y direutores. Ye lo qu'hai.
De Troya namái quedaron povises, como demostró nel so momentu, 1870, un alemán d'apellíu Schliemann que s'empeñó n'escavar ellí au Homero allugaba la ciudá hasta dar colos restos de la quema, que debió ser llerciosa, y tamién col conocíu como Tesoru de Priamo, el rei, pá del noble Héctor y responsable, al refugar la entrega d'Helena, del holocaustu de fueu en qu'aquello acabó.
N'Asturies tamos lloñe, per agora, de paecenos a Troya, y el presidente Barbón nun tien talante belicosu, pero la imaxe de los vecinos de nueso bregando colos sos bomberos forestales, y en munchos casos cola ayuda de la UME, escontra l'acosu d'incendios descomanaos, de valumbu y carauterístiques desconocíes nel nuesu país nel pasáu próximu debería dar que pensar al nuesu Priamo particular, pos nesos fuegos podemos atopar señales abondo como pa recapacitar sobro les polítiques forestales anguaño en particular, y sobro les polítiques rellatives al agro en xeneral.
Ye llamativo qu'allende'l Negrón tean amburando con furor especial dellos parques naturales o nacionales. ¿Va ser, quiciabes, que les ordenances qu'a estos espacios afeuten, qu'enzanquen l'usu de los mesmos como espaciu económicu y d'aprovechamientu pa los pocos lugareños que van quedando nes sos cercaníes, convierten el monte nun polvorín inmensu pol atropamientu de material inflamable? O sedrá, como les declaraciones oficiales paecen indicar, too debío al cambiu climáticu.
La mayoría de los pueblos asturianos tienen visto col pasu de los años como s'abandonaben huertes y praos na so contorna averada, espacios qu'enantes, con un monte saniáu, suponíen una torga adicional frente al fueu. Güei les arbolees, de crecimientu natural, lleguen hasta les cases y sofitense nos teyaos, dando una imaxe de paraísu natural qu'esconde un peligru potencial de calter esplosivu y que más pronto que tarde, si non s'activen polítiques de prevención, va facer que n'Asturies esllagrimemos como estos díes lo faen en delles partes d'España.
Señor Barbón, póngase les piles, llimpie'l monte darréu ensin esperar al próximu programa eleutoral. Non too ye cosa del cambiu climáticu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo