De Selgas al Boombastic, pasando per San Lorenzo
Entá nun aportó agostu, cola so selmana grande, y ta'l Principáu que nun cabe un anfiler. Dicen que yá nun queden habitaciones llibres, anque los del ramu del chigre quexiquense del baxu consumu y del amontar de los costes. Sedrán coses del branu, o ye posible que les nubes menaciantes de la seronda económica s'atopen tres el muncho movimientu d'algunos y el poco condumiu d'otros. Sicasi, Asturies, una vegada más, nun paez envidiar al Mediterráneu.
La fiesta aeronáutica del arenal de San Lorenzo, de nuevo y magar el sofitu ronciegu de la Casa Consistorial, conviertese nel gran acontecimiento del estivu, anguaño ensin la guinda de la Feria taurina; y son los propios asturianos, cola so presencia masiva y familiar en redol al Muru, los que refrienden el so interés poles evoluciones de los estremaos medios aéreos. Que siga.
Nos praos de Llanera'l festival Boombastic aconceya a milenta mozos en redol a un elencu varíau de músicos, y con comportamiento cívicu y ordenado acordies l'ausencia de denuncies paez indicar, daqué que siempres ye d'agradecer, especialmente por aquellos que trabayen nel ámbitu de la seguridá pública. Ye un fenómenu, esti de los festivales, que paez dexar arrequexaos los vieyos conciertos individuales d'otros tiempos; va ser quicías porque resulten, nos sos resultaos económicos, menos inseguros pa los artistas, anque pocu se sabe de les condiciones laborales de los oficios que sofiten tola parafernalia d'estos eventos. A vixilar.
Pa los más veteranos, o quiciabes esquisitos, queden dellos llugares disponibles pal esparcimientu y la cultura, que pasen desapercibíos, o simplemente nun interesen, pal turismu en xeneral. Ún d'ellos ye la Fundación Selgas, que nos tiempos caberos fo motivu de noticia poles práutiques pocu nidies del presidente y la falta d'atención del Principáu, nella atopamos un palacio espléndidu del S. XIX perfeutamente amuebláu y, sobre too, un conxuntu de xardines nel que destaca, amás de les araucanies enormes, un bosquín de secuoyes increíbles abondo pa colmar el deseyu d'aquellos que nun-yos llega pa visitar les orixinales californianes. Una delicia de visita que pocos conocen y s'atopa a la nuesa disposición nel centru d'Asturies.
Les playes, espléendides, siguen ehí, a lo llargo de la costa asturiana, también la gastronomía de nueso y los Picos maxestosos, y la densidá de los nuesos visitantes pueden llevar a pensar a más d'un que nesi turismu creciente ta'l futuru de la rexón, pero ello va requerir d'inversiones, y la cortedá del nuesu branu, magar el cambiu climáticu, nun asegura el so rendimiento. Prudencia.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo