El reclamu del Sporting
Quexicabense esta mañana dominguera esplendida dalgunos foriatos, tres esfrutar de les Lletrones nel Muelle, de la impertinencia de la camiseta sportinguista, que-yos torgaba sacar una fotografía perfecta del rei Pelayu y el palaciu del Marqués de Revillaxixedo al caltener ocultu un de los dos torreones baxo’l brillu y colores del cartelón que lu adorna dende va yá un par de selmanes. Y ye que l’aportar del propietariu mexicanu nuevu del Sporting tá dando pa muncho.
La tema rexonal ente l’Uvieu y’el Sporting tien servío pa enllenar parolaes de playos y carballones mientres delles xeneraciones yá. Agora, amás de los nuesos llocalismos tradicionales, vamos poder presumir d’internacionalidá al tener en dambes propiedaes deportives a sendos grupos económicos llegaos de la gran nación qu’aniciara Hernán Cortés, y que, como tuzos y chilangos, xentiliciu popular correspondiente a los naturales de Pachuca y Ciudá de Méxicu, van poner un añedíu picante jalapeñu a los siempre emocionantes derbis asturianos.
El casu ye qu’a mín, el parón curtiu énte’l comentario foriatu, díome pa pensar que son yá, quiciabes, demasiaos díes pa un cartel publicitario, por más que seya la camiseta del Sporting, y qu’al pie del Palaciu, como acosándolu, entá permanecen cuatro cartelones vacios de la Fundación CaxaAstur -¿Entá esiste?- que mos recuerden qu’el acuerdu cola propiedá del Palacio visaba a fines más altos; daqué que, desgraciadamente, paez que yá namái ye un recuerdu.
En Xixón contamos con una de les ufiertes culturales mayores d’España nel so aspectu continental, esto ye, tocantes a edificios o espacios públicos supuestamente dedicaos, o susceptibles de selo, al fomentu de la cultura o’l conocimientu. Vienme en primer llugar a la tiesta, de forma obvia y obligada, el mayor edificiu d’España, la Universidá Llaboral, vexetando dende va dellos años, ente dalgún conciertu y dalgún actu oficial, a la espera que dalgún arquitectu lu declare en ruina inhabilitante. Dalgo, por otra parte, razonable si tenemos en cuenta la Llei de Memoria Histórica, ya casi tresmutada en Memoria Democrática, anque nun s’aplique a los pantanos de Pachín.
Amás del Escorial asturianu, en Xixón contamos con otru mamotretu a la gueta d’usu. La Tabacalera de Cimavilla sigue anguaño, depués d’años y millones d’euros, esperando que’l Consistoriu de nueso s’aclare en rellación colo que piensa facer con esti edificiu cargáu d’historia xixonesa que güei namái sirve pa fondu de fotu de grupos de despedidores solteriles, actividá cultural na que Xixón brilla con lluz propia, mientes se ponen hasta ehí de beber sidra na Plaza del Llavaderu. Ye lo qu’hai.
Y mientes de conteníu cultural... pocu.
Raúl Suevos
A 31 díes vencíos de xunetu de 2022
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo