Pero nun tienen pudrideru
Confieso la mio sorpresa y allorie. Nun algamo a pescanciar l'avalancha de grandes comunicadores desplazaos a Londres, más que los qu'allegaron a les fasteres del volcán de La Palma, que foron munchos, y namái alcuentro xustificación nel dichu vieyu de McLuhan de que "el mediu ye'l mensaxe". Quiciabes tea ehí la esplicadura, n'amosanos la importancia del mediu propiu con ocasión de lo qu'ellos creen una oportunidá informativa grande, la muerte de la monarca inglesa tres 70 años de reinao; un gran record induldablemente.
Más allá de la importancia informativa, chócame el güeyar y oyer a tou quisque que se considere a sí mesmo con ciertu nivel social llanzándose a una competición por ver quien tien más aponderamientos y allabancies na recamara p'allancialos via micrófonu, Twitter o Telegram, too val con tal de nun quedase curtios. Y a min, tres el desconciertu, nel casu nacional, hasta me cabrea.
Que'l Rei allegue a la embaxada a roblar nel llibru de pésames pos como que va de so; ye un xestu institucional obligáu, pero más allá d'eso compruebo que a dalgunos paez que se-yos fo la pota na xesticulación porque, esplíca-y me a min que facen Andalucía y Madrid decretando díes de lutu pol fallecimientu. Quiciabes tienen lleío que Fidel Castro decretó tres díes de lutu pol pasamentu de Franco, nun lo sé. Pero inquietame.
Lo de la fraternidá con Marruecos ye un dichu perenal na boca de los nuesos políticos pero tolos españoles sabemos que non, qu'eso d'ehí abaxo ye otra cosa; y lo mesmo pasa colos fíos de la Gran Bretaña, que son los que con más enfotu trataron de xingar a España dende tiempu inmemorial. Los mesmos qu'una vegada tres otra, saltándose les resoluciones de NN XX, dan llargues cola devolución de Xibraltar, y nun pierden oportunidá d'únviar a los sos atoños en viaxe de novios, o lo que cuadre, col oxetivu simple de recordanos qu'ehí siguen. Toos fíos o nietos de la recién fallecida.
Agora toca'l funeral, qu'entama creo n'Edimburgo pa tocar la fibra de los escoceses y apangar les ansies del vieyu reinu, al que van allegar xefes de gobiernu de tol mundiu, porque, a lo último, va servir pa reforciar la imaxen institucional de toos ellos pente medies el parabuxel y la solemnidá que los ingleses saben dar a estos eventos.
Tamién va dir el Rei de nueso, perteneciente a una dinastía borbónica muncho más populista, a vegaes populachera, que los renomaos y estiraos Gotta-Coburgo, pero tiesta de un reinu vieyu au nació'l parlamentarismu nel llonxanu sieglu XII; tan vieyu que, anque casi siempres se mos muerran fuera de casa, enantes de nada unviamolos al pudrideru.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo