San Himarsu y zarra Ucrania
Con delles variantes na so composición esacta paez un fechu ciertu que la frase "Santiago y cierra España" vien usándose nes batalles españoles dende los tiempos del choque de Les Naves de Tolosa, nel llonxanu 1212, y yá lo referencia'l gloriosu mancu na so obra universal, lo cualo-y da un refrendu adicional.
N'Ucrania, que yo sepa, nun cuenten con daqué de semeyante, anque vaya vusté a saber. Lo que sí ye verdá ye que, na recien campaña defensiva, foi abondo avezao que los combatientes se encomendaran a Santa Xabalina, por aquello de los misiles contracarru Javelin de cabera xeneración que, xunto con otros arbíos de la industria militar occidental, ensin escaecer los yá pernomaos drones turcos Barayktar, y el comportamiento heróicu de les tropes ucranianes, frenaron primero y dempués refugaron al teóricamente tarrecible exércitu rusu.
Ente los inxenios y ayudes menos publicitaos tamién taba la intelixencia de toa mena suministrada polos EE XX, dalgo que continúa na nueva y victoriosa fase ofensiva de la campaña a la qu'agora asistimos y na que los ucranianos paez que tienen camudao de santu y agora encomiendense a San Himarsu, patrón de los llanzadores de cohetes HIMARS, de guía satelital y érru máximu de dos metros a 50 km.
Con ellos y la munición excalibur, tamién guiada per satélite, p'artillería de llargu algame, algamaros aisllar, pente medies el bombardéu quirúrxicu de pontes en carreteres y víes férrees, a les unidaes ruses, que quedaron ensin reposición loxística enantes de sufrir l'ataque d'unidaes ucranianes nueves, formaes, armaes y adiestraes mientes estos meses nos que los sos collacios del frente aguantaron el sistemáticu bombardéu rusu. Pero esto nun lo esplica too.
Nel Dombás, en 1991, y magar ser rusófonos, como'l propiu Zelensky, votaron más del 85% pola independencia. Falamos d'una población que se siente y quier ser ucraniana, magar la propaganda rusa, que se ve ocupada dende 2014 nunes zones y dende febreru caberu notres, con imposición y llei marcial, y con unos estándares vitales mui per debaxo de los d'Ucrania, un de los países más pobres d'Europa. Son los qu'agora pasen información exacta sobro depósitos de municiones y puestos de mandu rusos a San Himarsu.
Al tiempu, el mandu ucranianu tien sío a montar una descomanada operación sicolóxica, PSYOPS, o lo que nos planes antiguos llamaben medies de decepción, que llevó a pensar qu'atacarían nel sur, Jersón, haza onde los rusos desplazaron les sos unidaes, mientes acumulaben dos divisiones, 10.000 combatientes, nel norte, averao a Jarkov, pa romper el frente rusu estrepitosa y esitosamente.
Anguaño la guerra tien otra color, y non too ye cosa de San Himarsu, anque ayuda abondo.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo