Il moro di Venezia
Ye’l nome d’una perconocía ópera de Rossini, pero tamién el d’un veleru maraviosu, vencedor nes regates de tol Mediterráneu demientres dellos años, que’l so armador y patrón ocasional yera Raúl Gardini, un potentáu italianu qu’algamara tala condición pente medies el clásicu braguetazu y que llevara la vieya firma familiar a la cume del poder económicu d’Italia.
Detrás de too ello taba un sistema de corrupción política conocíu como Tanyentopoli, qu’algamaba a casi tolos partíos políticos y que supunxo la disolución de munchos d’ellos. El suicidiu de Gardini fo un más ente munchos, anque dalgunos, como Bettino Craxi, el secretariu xeneral de los socialistes y yá primer ministru, tomó les de Villadiego, esto ye, escapóse a Hammamet, en Túnez, país que nun tenía tratáu d’estradición con Italia, y u morrió dalgunos años dempués.
El “casu Tanyentopoli” desendolcáronlu un grupu de fiscales milaneses conocíu como Mani Pulite, nome de la operación, que contaron cola comprensión de la xudicatura, y p’algamar la conderga de los que nun siguieron la vía de Séneca idearon un conceutu llegal nuevu, “non poteva non sapere”, esto ye, nun podía nun saber d’ello, que vien a dicir que dau’l puestu qu’ocupaba taba obligáu a saber y responder polo que nel so nome se facía.
Estos díes, n’España, asistimos al sentir opuestu de lo que se fizo n’Italia. Tres ser condergaos definitivamente un bon númberu de cargos políticos n’Andalucía, tres dellos años de corrupción y malversación, con esplícitas afirmaciones de parte del Tribunal Supremu, asistimos a una operación de la clas política pa llograr l’indultu del más bultable d’ellos, un vieyu ministru socialista y presidente del Gobiernu andaluz; al que siguiríen darréu los sos collacios, con muncha probabilidá.
La situación, como ciudadanu d’a pie, resúltame espantible, especialmente cuando lleo los nomes de los roblantes d’una carta de sofitu a esi indultu. Una medida de gracia que mos unviaría al restu d'españoles de nuevo a una sociedá estamental, lloñe del Estáu democráticu y de drechu que la Constitución mos prometía. Una sociedá na que tendríen desapaecío los guerreros, encarregaos de la defensa, tamién los sacerdotes, responsables de la oración, y na que siguiríemos los siervos y la clase nobiliaria, anque nesta sociedá nueva estos caberos sedrín sustituyíos pola clas política, auténticos sátrapas del restu del país, a lo menos no qu’a drechos se refier.
Nun me sorprendió la operación carta de sofitu, anque sí que me dolió ver dalgún de los nomes qu’ellí apaecen, ye lo qu’hai.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo