El perru flacu cubanu
L'atención de la prensa mundial, nestos meses caberos, paez nun tener meyor oxetivu que tolo rellacionao cola guerra d'Ucrania, y ello ye natural, sobre too si tenemos en cuenta qu'implica a una de les grandes potencies nucleares y a un país nel patiu traseru de la Europa que conocemos y de la que formamos parte. Ye lo qu'hai.
El restu de conflictos, como por exemplu'l Sahel, que tamién mos afeuta directamente anque munchos nun se quieran enterar, pierde espaciu nes páxines de los periódicos y nes escaletes de los informativos radiofónicos o televisivos, anque ellos van acabar por algamar la su cuota d'atención pública, y más ceo que tarde, desgraciadamente. Ye la llei qu'impón l'eurocentrismu informativu, u occidentalismu si asina prefieren nomalo. Pero hai otros mundios, y otros drames.
A Cuba va yá un tiempo que nun la vemos na primer plana. Quiciabes dende que'l añu caberu'l réxime castrista foi a reconducir, cola so represión tradicional, les surxencies de protestes populares nel país, dalgo inaceptable pa una oligarquía militar más avezada a los incontenibles salideros d'agues fecales na Habana Vieya y Centru, siempre recurrentes. Foi un finxu negativu nuevu de la historia revolucionaria; unu más.
Na Cuba d'estos díes too ye miseria, anque teniendo en cuenta los cientos de miles de cubanos que tienen escapao d'esa prisión nos años caberos podemos deducir que cada día tóca-yos una cuota mayor d'esi productu, la probiteria, a caún de los residentes, sacantes los de la clas dirixente y los sos familiares, claro.
L'apuesta de López Calleja, el xenru de Raúl Castro recien fináu y gurú económicu del réxime, pol negociu turísticu tien llevao a la inversión de los pocos ingresos del país na construcción d'hoteles d'altu estanding pa unos turistes que dende l'aportar del covid nun se dexen ver, y qu'agora, cola enchente ya imparable epidemia de dengue, ye entá menos probable que lleguen, convirtiendo asina la inversión en capital bloquiáu y ensin rentabilidá.
Les remeses, los cuartos que los emigrantes unvíen con calter regular a los sos familiares, ye lo único que crez y caltien la economía cubana nesti momentu, y nun paez vese dalu rayu de lluz nel horizonte; al contrario, les perspectives climátiques nun son nada falagueres, sinon más bien catastrófiques.
Una de les zonas bendites pola naturaleza na vieya Perla del Caribe ye la de la provincia de Viñales, colos sos mogotes rocosos, meta de turistes milenta, y, sobre too, les fabuloses plantaciones de tabacu en Vuelta Abaxo, Pinar del Rio, fuente cabera de divises. Agora too ello atópase baxo la menacia de "Ian", una tormenta tropical que va llegar camudada en huracán mayor el martes vieniente y que va acabar coles esperances de los qu'ellí sobrevivíen nela incompetencia castrista.
A perru flacu too son pulgues.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo