La Nueva España » Cartas de los lectores » A la pita España malapenes-y queden plumes

A la pita España malapenes-y queden plumes

27 de Noviembre del 2022 - Raúl Suevos (Gijón)

De neñu pasaba los branos na casa familiar de Marentes, n'Ibias. Yera un estivu tremendamente risonderu y sorprendente pa un guae de ciudá, anque'l Xixón de finales de los cincuenta tampocu ye que fuera Manhattan precisamente. Y el mundiu animal del caseríu, abundosu, aportaba un plus descomanáu al conocimientu de la vida que la escuela nun podía suplir.

Entá tengo l'alcordanza de qu'ente les pites solía haber una d'apariencia malfecha, con poques plumes, menos cadía. Una pita que yera oxetu de la roxura del gallu del corral y tamién de les propies collacies, qu'a picotazos díbenla desaposiando del so plumaxe, dexando ver un cuerpu esbirriáu en comparanza col volumen polencu que les plumes daben a les so hermanes. A min, malapenes un guae de 5 añiños, l'asuntu dábame pa velees que, en munches ocasiones, cortaba'l glayíu nochirniegu de la raposa intentando en davanéu asaltar el piteru. Al cabu d'un tiempu la hestoria finaba de secute cuando la tía Sara facíase cargu del negociu, y la espenada pita acababa nel pote.

Estos díes vienme'l recuerdu de la pita cuando güeyo lo qu'asocede cola subasta qu'un gobiernu débil se ve obligáu a facer pa sacar alantre los so Presupuestos. Dalgo, por otra parte, abondo normal nel xuegu parlamentariu naquellos países que tienen la suerte de contar con esti sistema políticu. Pero suponíase qu'había delles llendes infranquiables a la hora de subastar, pos eso paez la situación anguaño, los recursos del Estáu.

Les noticies d'ayeri diéronmos cuenta de les plumes caberes, per agora, que-y rincaron a la pita España. Dalgunes yeren pa facenos llorar a los asturianos al tomar razón de los 250.000 euros que van dir pa la promoción del circu en vascuence. ¿Nun me digan que nun suena a coña? Mientes l'Academia de la Llingua supongo que va deber esperar a que dalgún diputáu valencianu, como l'añu caberu, introduza una moción pa dotar con 100.000 euros a la humildosa institución rexonal.

Polos pasiellos de les Cortes siguen cayendo les plumes de la pita, de más que improbable reposición, y una de les caberes, y quiciabes la más dolorosa polo qu'implica, foi la retirada de la Guardia Civil de tráficu de les carreteres navarres. Una pluma que se va llantar a mou de troféu nel so penachu'l grupu Bildu, heriede de los asesinos d'ETA, que con esta cesión del doctor Sánchez algama que'l sangre derramao demientres los años de chombu paeza que nun sirvió pa un res, y qu'aquellos guardia civiles de la Barranca se sientan güei como si la xauría d'Alsasua siguiera patiándolos nel suelu. Ye lo qu'hai.

Cartas

Número de cartas: 44966

Número de cartas en Marzo: 181

Tribunas

Número de tribunas: 2031

Número de tribunas en Marzo: 7

Condiciones
Enviar carta por internet

Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.

» Formulario de envío.

Enviar carta por correo convencional

Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:

Calvo Sotelo, 7, 33007 Oviedo
Buscador