Navarra yá nun ye Navarra
Facía ayeri fríu en Pamplona, nada que nun correspondiera al mes d’avientu, pero, con eso del cambéu climáticu, lo qu’enantes yera normal agora paez una invasión polar. Too va camudando, quiciabes endemasiao rápido, y los mamíferos bípedos que verbenen pel país tamién lo noten, séfrenlo, asúmenlo, y actúen arriendes d’ello.
El clima políticu de Navarra va yá muncho tiempu qu’entamó la so evolución, y el d’anguaño nada tien que ver col de va dellos años. Pocu queda de lo que representaba’l vieyu reinu. Nin siquier los sanfermines, qu’anguaño son pura mercadotecnia y economía. Nin tampocu la Ribera, históricu esllabón de la cultura del Ebru qu’algamó a cuntar col “tercer rei d’España” nos tiempos de Musa Ibn Musa, y que güei ye pastu de les ikastoles vascuences col so procesu d’aculturación incluyíu dende la infancia. Ye lo qu’hai.
Ayeri facía friu na vieya Pompaelo. Convocaba l’Asociación de Víctimes del Terrorismu de Navarra, casualmente nel 35.º aniversariu del atentáu al cuartel de la Guardia Civil de Zaragoza, entá güei esperando que’l mandante, Ternera, seya puestu a disposición de la Xusticia. Convocaba p’amosar el so refugu a la “expulsión” de la Guardia Civil de Tráficu de la foral Navarra, y respondieron tantes organizaciones y partíos que cabía esperar falta d’espaciu. Pero non.
Unos cuantos centenares, quiciabes milenta, nun había más ellí. Y ello magar la presencia de casi tolos líderes del arcu conservador navarru y nacional. Nin por eses. Navarra yá nun ye Navarra; ye un apéndiz del País Vascu; la vieya aspiración de los líderes independentistes heriedes del racista Sabino Arana. Poro ayeri podía apreciase un sentimientu de decepción al atalantar que del vieyu reinu queda yá bien pocu. Y entá va quedar menos.
Nun puedo maxinar una solución. El nuesu sistema electoral faimos cautivos d’esos votos independentistes, muncho más concentraos y rentables que nel restu d'España, y pa modificar la situación habría que camudar el sistema electoral; dalgo, viendo cómo les gasten los dos grandes partíos nacionales, inimaxinable anguaño.
Esi cambiu llegal, a min paezme imprescindible si queremos caltener la esperanza d’una nación española. Con un sistema electoral mistu, a la alemana, acabaríense los chantaxes al partíu del Gobiernu. Eses estorsiones que güei paecen arrastranos haza un precipiciu del que, me temo, nin Europa podría llibranos.
Con esi cambéu quiciabes Navarra podría llegar a ser consciente de que nun son hermanos de los vascos, tan etnicistes ellos, que los sos halogrupos del ADN mitocondrial son estremaos de los bereberes, qu’ellos yá taben neses tierres cuando los vascones, desertores de les tropes d’Aníbal, pasaron camín del País vascu.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo