El conseyeru d'Educación y l'asignatura de Llingua Asturiana
El conseyeru d'Educación, señor Sastre, paez que quier recurrir el fallu del Tribunal Superior de Xusticia d'Asturies nel que se diz que los alumnos que lo soliciten tienen derechu a recibir clase de Llingua Asturiana, con independencia del númberu de solicitantes. Abúltame que resulta procedente acordase de lo que pon la Resolución de 16 de mayu de 2008 de la Conseyería d'Educación y Ciencia, pola que s'establecen la oferta y les condiciones pa escoyer materies optatives y opcionales en Secundaria Obligatoria. Nesa resolución, lléense les siguientes coses:
1.º: Que la materia de Llingua Asturiana ye d'oferta obligatoria;
2.º: Que los alumnos/es pueden incorporase a la materia en cualquier cursu;
3.º: Cito literalmente l'artículu 5.2: ...los centros docentes pueden constituir grupos pa la impartición de cualquier materia optativa con un númberu inferior al mínimu establecíu nos apartaos anteriores [8 alumnos] siempre que'l centru docente considere necesaria la so constitución, que disponga del profesoráu cualificáu suficiente pa impartila y que'l númberu másimu de grupos de materies optatives nun pase del númberu, redondeáu al enteru superior si ye decimal, resultante de multiplicar 1,5 pol númberu de grupos autorizaos pal cursu.
Vamos esplicar esta cuenta: nun institutu con tres grupos del mesmu nivel de Secundaria (tres primeros, tres segundos, etcétera), que ye lo más normal, multiplicamos el 3 por 1,5, y obtenemos 4,5. Redondeamos p'arriba y salnos 5. Si l'institutu nun ofrez más de cinco materies optatives a los alumnos, tien permitío pola Conseyería formar grupu de Llingua Asturiana anque seya namás pa un alumnu. Como les úniques optatives nos cursos 1.u y 2.u son dos (Llingua y Francés en casi tolos casos), los alumnos que pidan asturiano nestos cursos siempre, repito: siempre tán dientro esi cálculu. En 3.u y 4.u, tamién mui probablemente. Si hai más de cuatro grupos por nivel, les posibilidaes de formar grupu d'asturiano pa un númberu pequeñu de solicitantes son tovía mayores.
Vamos a la otra clave: que l'institutu disponga del personal cualificáu. Ente funcionarios y interinos, prácticamente nun queda institutu n'Asturies que nun tenga profesor acreditáu pa impartir la materia. Queda nel aire, claro, la voluntá del centru, que tien que considerar necesaria la so constitución: nun esiste ninguna razón defendible pola qu'un centru d'enseñanza niegue una optativa a un alumnu cuando tien de so parte la legalidá (como acaba de vese) pa ofrecé-yla: facelo d'otra manera supón imponese a la voluntá de los padres por caprichu de la dirección.
P'acabar, convién parase a estudiar lo que'l Conseyeru llama despilfarru (esa ye, polo visto, la so gran argumentación pa negase a cumplir la sentencia del tribunal). N'Asturies hai alredor de setenta institutos. Casi toos ellos tienen profesor de Llingua (casi toos quier dicir qu'igual hai menos de diez que nun lu tengan). D'ellos, una quinta parte ya tienen profe con xornada completa; a los demás, trátase de subi-yos el mediu horariu a completu. ¿Ú'l despilfarru?, n'ochocientos euros más al mes pa cuarenta persones? ¿Xustifica esi gastu (d'otra manera, obligáu según la normativa redactada pola mesma administración, respaldada pol Estatutu d'Autonomía y bendita pol TSXA), insignificante en comparanza con otres coses, un recursu y una dilación que va conculcar los derechos d'unos alumnos hasta qu'otru tribunal superior los confirme tamién, siempre según la estratexa de la Conseyería de metese en pleitos pa dexalos n'herencia al que venga depués, que, anque tenga les mesmes sigles, nun va ser de la familia? Amás, eses poques perres pa educación son bien fáciles d'atopar: sobra con que la TPA aforre en retransmisiones de Fórmula 1 que, a fin de cuentes, yá da gratis la 6.
Milio Rodríguez Cueto
Profesor d'institutu
Xixón
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo