Gabriele d'Annunzio
En Florencia, ciudá maraviosa, fai muncho calor nel branu, con un puntu d'humedá sofocante que-y da'l ríu Arno, que la atraviesa, y el tar arrodiada de montañes o colines. Yera normal escapase al tapecer a Fiesole p'alendar, o, nel nuesu casu, a Settignano, menos conocíu y afayadizu pa cenar en familia.
Anguaño'l pueblu ye más conocíu porque a los sos pies atópase la instalación de la Squadra Nazionale Calcio, esto ye, el centru d'entrenamientu de los azzurri, pero nel pasáu fo au criaron nuna familia de picapedreros a un talu Miguel Ángel. Ellí entró-y el venenu de la escultura. Tamién los Medici decidieron construir una de les so villes, anguaño visitable; y yá al entamu del sieglu XX un paisanu particular, ídolu de mases pa los estándares actuales, instalose mientres dellos años cola so amante temporal, la actriz Eleonora Duse, nuna casa del llugar, la Capponcina. Yera Gabriele d'Annunzio.
Na nuesa dómina'l sitiu convirtiérase nuna trattoria con terraza almirable, na que se podía allargar la sobremesa y que, nel mio casu, abriome la puerta a la vida d'esta singular figura. Un home casi inabarcable, poeta de sonadía dende mui mozu, dramaturgu, novelista, provocador cultural, amáu de les mases, y de les muyeres. De Settignano colaría, agobiáu poles deldes, pa un autoesiliu francés de varios años.
Descubriría entóncenes la velocidá, rodada y aérea, lo que lu llevaría a participar y organizar dellos certames, pero, sobremanera, a convertirse n'aviador, casi un as nesos años primeros, nos que, aportada la Primer Guerra Mundial, participa como oficial d'Infantería y como valerosu pilotu, lo que lu lleva a perder un güeyu y casi la vida. Pa entós, más qu'ídolu, yera un héroe nacional.
Inconformista hasta la estravagancia, pa 1919 llánzase, acompañáu de 200 correlixonarios, a los que diben siguir varios miles, a ocupar l'adriática Fiume, la Rijeka actual, una ciudá de población y llingua italiana, que quedaba en manes del recién formáu reinu de Yugoslavia y na que llegaría a promulgar una Constitución a la espera del sofitu del gobiernu italianu, dalgo que nunca llegaría, enantes al contrariu, impondría-y un bloquéu ferreu en cumplimientu de los Trataos de Rapallo que llevaría al incomprendíu héroe a abandonar la ciudá en 1921, trés vese asediáu y combatíu pol propiu Exércitu italianu.
Diba escomencipiar entóncenes la parte final, y, en ciertu mou, dramática, de la vida de D'Annunzio, pos, nun actu solime de protesta, pa él y los sos siguidores, decide autoesiliase de por vida na so villa de Gardone Riviera, nel caiquín del Lagu de Garda.
Debe rellenar todos los datos obligatorios solicitados en el formulario. Las cartas deberán tener una extensión equivalente a un folio a doble espacio y podrán ser publicadas tanto en la edición impresa como en la digital.
Las cartas a esta sección deberán remitirse mecanografiadas, con una extensión aconsejada de un folio a doble espacio y acompañadas de nombre y apellidos, dirección, fotocopia del DNI y número de teléfono de la persona o personas que la firman a la siguiente dirección:
Calvo Sotelo, 7, 33007 Oviedo